Што стрымлівае развіццё вытворчага бізнесу? Абмеркавалі прадпрымальнікі ў Віцебску

Сёння ў эканамічным сектары вялікія надзеі ускладаюць на бізнес, улічваючы яго гнуткасць і мабільнасць, а значыць, і больш устойлівую пазіцыю на рынку. Пры гэтым стаўку робяць на вытворчы, звязаны з інавацыямі, дзе больш магчымасцей выпускаць канкурэнтаздольную прадукцыю, выкарыстоўваць сучасныя тэхналогіі, забяспечваць працоўныя месцы. Вядома, існаванне такога бізнесу – справа няпростая, і тут не абысціся без увагі і падтрымкі з боку дзяржавы, задача якой – стварыць спрыяльныя ўмовы для прыватнікаў. Адпаведным абяцае быць і аддача.

У апошнія гады ў дадзеным напрамку на заканадаўчым узроўні зроблена нямала. І ўсё ж ёсць мноства момантаў, якія трывожаць вытворчы бізнес, тармазяць яго развіццё. Гэтай тэме была прысвечана сустрэча ўладальнікаў прыватных вытворчасцей Віцебска на базе НПЦ «Спецсістэма», якую ініцыявала Асацыяцыя наймальнікаў і прадпрымальнікаў. Як паведаміў дырэктар ПП «Машынабудаўнічая кампанія «Віцебскія пад'ёмнікі» Андрэй Сідараў, нядаўна ён размаўляў з кіраўніком вобласці, і Мікалай Шарснёў цікавіўся, што сёння перашкаджае працаваць бізнесу на Віцебшчыне.

Пытанні і прапановы агучыў кожны з прысутных. Варта адзначыць, што гаварылі сапраўды пра важнае, але бачнае толькі тым, хто з гэтым сутыкаецца, натыкаючыся на сур'ёзныя перашкоды або проста губляючы час і сілы. Андрэй Сідараў адзначыў недахопы мытнага заканадаўства, з-за якіх прадпрыемству прыходзіцца несці фінансавыя страты, штогадовае пацвярджэнне сертыфікатаў у БелГПП на прадукцыю, якая не мяняецца, разбежнасць заканадаўчых актаў па нагоды таго, што ўваходзіць у пералік вырабаў уласнай вытворчасці.

Уладзімір Кузняцоў, дырэктар СТАА «Віцебскі завод безалкагольных напояў» (брэнд «Віта»), зыходзячы з уласнага досведу гаварыў пра складанасці пры будаўніцтве з мэтай пашырэння вытворчасці: часам само будаўніцтва доўжыцца тыдзень, а дакументы і дазволы прыходзіцца збіраць не адзін месяц.

Трывожыць бізнесменаў і той факт, што

невыкарыстаная дзяржмаёмасць проста купіць за адну базавую, але вельмі складана увесці ў гаспадарчы зварот. Калі гэту працэдуру спрасціць, то прастойваючай без справы і разбуральнай нерухомасці было б менш. Бывае і такое, што пры пакупцы будынка мясцовыя ўлады навешваюць на прадпрымальніка дадатковыя абавязкі: абсталяваць аўтастаянку, асвятленне вуліцы, ліўневую каналізацыю, што проста не па сілах невялікаму прадпрыемству, дзе ў штаце дзясятак чалавек. Для многіх непад'ёмным з'яўляецца каэфіцыент па зямельным падатку ў абласным цэнтры. На думку бізнесменаў, не такім чынам трэба прыцягваць сродкі ў бюджэт, гэта цягне хутчэй страты, бо некаторыя вымушаны спыняць дзейнасць.

– Часам справа зусім не ў заканадаўстве, а ў стаўленні з боку выканкамаў, – адзначыўстаршыня Асацыяцыі наймальнікаў і прадпрымальнікаў, генеральны дырэктар ТАА «Альянспласт» Мікалай Сілінаў. – Калі я адкрываў новы цэх у Шуміліна, то сапраўды бачыў падтрымку мясцовых органаў улады. Яны былі зацікаўлены ў тым, што з'явяцца вытворчасць, новыя працоўныя месцы, і аказвалі садзейнічанне. Але, на жаль, не паўсюль так. Хацелася б, каб у рэгіёнах задумаліся аб комплекснай падтрымцы бізнесу і яго суправаджэнні ад праекта да адкрыцця, гэта прыцягнула б пачаткоўцаў прадпрымальнікаў.

Дарэчы, аб гэтым на нядаўнім пасяджэнні аблвыканкама, прысвечаным развіццю прадпрымальніцкага сектара на Віцебшчыне, гаварыў першы намеснік старшыні аблвыканкама Генадзь Грэбнеў. Ён канстатаваў: у асобных раёнах не наладжаны пастаянны дыялог бізнесу і улады, што адбіваецца на эканоміцы, і паставіў задачу – стварыць умовы для эфектыўнай працы прадпрымальніцтва. Як яна будзе выконвацца, пакажа час. Але наогул дзіўна, што даводзіцца ставіць такую задачу, бо хто, як не самі райвыканкамы, павінен быць зацікаўлены ў прыцягненні дадатковых фінансаў і занятасці насельніцтва. А пакуль бізнес будзе гаварыць аб сваіх праблемах, каб быць пачутым.

Дарэчы

Як адзначылі ў асацыяцыі, усе прапановы будуць абагульнены, па выніках плануюцца семінары з пэўныміспецыялістамі, якія дапамогуць у вырашэнні ўзнікаючых пытанняў, і, вядома, зносіны з органамі ўлады. Па такім жа прынцыпе бізнес-супольнасць правядзе сустрэчы з удзельнікамі са сфер гандлю, паслуг і іншых. 

Вольга Маслоўская, «Віцебскія весці». Фота з адкрытых крыніц.