COVID-2019: у Віцебску на ўзмоцнены рэжым працы пераведзена амбулаторна-паліклінічная сетка

Паводле Міністэрства аховы здароўя, у Беларусі на 7 кастрычніка выздаравелі і выпісаны 75683 пацыенты (плюс 307 за апошнія суткі), у якіх раней быў пацверджаны дыягназ COVID­19. Зафіксавана 81505 чалавек з станоўчым тэстам, у тым ліку 415 новых выпадкаў за суткі. За ўвесь перыяд распаўсюджвання інфекцыі на тэрыторыі краіны памерлі 874 пацыенты (плюс шэсць за суткі) з выяўленай каранавіруснай інфекцыяй.

У сувязі з уздымам інфекцыйнай рэспіраторнай захворваемасці з 1 кастрычніка ў Віцебску на ўзмоцнены рэжым працы пераведзена амбулаторна­-паліклінічная сетка: у поўным аб'ёме функцыянуюць інфекцыйныя кабінеты, вядзецца асобны прыём хворых з павышанай тэмпературай. Аказанне планавай дапамогі ў паліклініках не прыпынялі, але абмежаванне неабавязковых і неэкстраных наведванняў пажадана. Акрамя абласной інфекцыйнай бальніцы да стацыянарнага лячэння каранавірусных пнеўманій у Віцебску падключаны перапрафіляваныя аддзяленні бальніцы хуткай меддапамогі на 150 ложкаў.

Таксама Мінздароўя ўнесла змены ў пастанову ад 10 красавіка 2020 года № 36, згодна з якімі кантактамі першага ўзроўню пры COVID­19 цяпер лічацца тыя, хто меў цесны кантакт з хворым на каранавірусную інфекцыю на працягу 4 дзён да і 10 дзён пасля з'яўлення ў яго сімптомаў захворвання. Таксама да іх адносяцца кантактаваўшыя з чалавекам з бессімптомнай інфекцыяй на працягу 4 дзён да і 10 дзён пасля даты ўзяцця ў яго матэрыялу для даследавання на COVID­19.

Медыкі пераканаўча рэкамендуюць кожнаму з нас выконваць меры прафілактыкі.

"Віцьбічы".