Дэклярацыю прыхільнасьці Мэтам устойлівага разьвіцьця ААН падпісалі ў Віцебску

Дэклярацыю прыхільнасці Мэтам устойлівага развіцця ААН падпісалі ў Віцебску, куды прыбыў тэматычны экспрэс, які падарожнічае па гарадах Беларусі.

У цырымоніі падпісання, якая прайшла ў гарадскім Палацы творчасці дзяцей і моладзі, прынялі ўдзел старшыня Віцебскага аблвыканкама Мікалай Шэрстнёў, пастаянны каардынатар ААН і пастаянны прадстаўнік ПРААН у Беларусі Санака Самарасінха, нацыянальны дарадца па пытаннях ВІЧ/СНІДу Упраўлення ААН па наркотыках і злачыннасці ў Беларусі Уладзімір Гардзейка, каардынатар праграмы ЮНЭЙДС у Беларусі Вера Ільенкава. "Арганізацыі Віцебскай вобласці шырока прадстаўлены ў міжнародных праектах ААН у сферы энергаэфектыўнасці, аховы здароўя, адукацыі, аховы прыроды і экалогіі. З улікам ініцыятывы ААН рэалізуецца маштабны і працяглы па часе праект "Зялёны горад". У аснове яго ляжыць паляпшэнне экалогіі - з бытавых адходаў плануецца атрымліваць метан і выкарыстоўваць яго для запраўкі рухавікоў замест дызельнага паліва, выкарыстоўваць яго ў камунальнай гаспадарцы, на прадпрыемствах харчовай, перапрацоўчай прамысловасці, пры транспартных перавозках пасажыраў, - сказаў Мікалай Шэрстнёў. - Хацелася б, каб у далейшым мацнелі нашы адносіны і больш цеснымі станавіліся кантакты. У вобласці гатовыя да больш цеснага супрацоўніцтва і эфектыўнай працы". У сваю чаргу Санака Самарасінха ад імя ААН выказаў удзячнасць органам мясцовай улады ў падтрымцы праекта "Экспрэс ААН-70 у Беларусі для Мэтаў устойлівага развіцця" - спецыяльнага цягніка ААН.

"Дэклярацыя ўключае 17 асноўных Мэтаў, але ўсе яны зводзяцца да двух аспектаў - гэта людзі і планета. Мы павінны аб'яднаць намаганні, каб захаваць і тое, і другое. Віцебская вобласць унікальная сваімі прыроднымі прыгажосцямі і здольна натхніць усіх нас на абарону гэтага багацця. Тут сабраліся людзі розных нацыянальнасцей, і Віцебск як месца, дзе праводзіцца "Славянскі базар", які шмат гадоў аб'ядноўвае розных людзей, менавіта таму прыбераглі на завяршэнне. Менавіта тут пройдзе гранд-фінал нашай акцыі", - сказаў прадстаўнік ААН.

Галоўнай тэмай "Экспрэса ААН-70 у Беларусі" у Віцебску стала навакольнае асяроддзе: пытанні энергаэфектыўнасці, экалогіі і ўдзелу мясцовых супольнасцей ва ўстойлівым развіцці. Чыгуначны вакзал Віцебска - апошні прыпынак перад вяртаннем цягніка ў сталіцу. У якасці пасажыраў у абласны цэнтр прыбылі супрацоўнікі ААН, прадстаўнікі шырокага кола партнёраў, грамадскіх аб'яднанняў, моладзь. У горадзе на Дзвіне ўдзельнікі праекта маюць намер абмеркаваць такія Мэты ўстойлівага развіцця, як аднаўляльныя крыніцы энергіі, адказнае спажыванне, барацьба са змяненнем клімату і яго наступствамі, абарона, аднаўленне і рацыянальнае выкарыстанне экасістэм і іншыя. У вагонах цягніка прэзентаваны дзікая прырода, унікальныя аб'екты, запаведнікі і заказнікі Віцебскай вобласці, экапраекты, якія рэалізуюцца ў рэгіёне.

Алена Ціханава, БелТА.