Дэлегацыі Славакіі і кітайскай правінцыі Шаньдун наведалі Віцебскую вобласць

Прадстаўнічая дэлегацыя Славакіі на чале з прэм'ер-міністрам Робертам Фіцам абмеркавала з кіраўніцтвам вобласці дэталі інвестыцыйных прапаноў, рэалізацыя якіх ужо ідзе або магчыма з удзелам капіталу з гэтай цэнтральнаеўрапейскай краіны. А напярэдадні у абласным цэнтры высадзіўся дэсант з кітайскай правінцыі Шаньдун з ініцыятывамі па развіцці індустрыяльнага супрацоўніцтва. Віцебшчына найбольш актыўна з беларускіх рэгіёнаў развівае кааперацыйныя сувязі з партнёрамі са Славакіі. За апошнія паўгода гэта ўжо другі візіт кіраўніка ўрада гэтай краіны менавіта ў нашу вобласць. Як адзначыў намеснік старшыні аблвыканкама Алег Мацкевіч, зараз рэалізуюцца шэсць супольных праектаў у розных сферах.

Па фармацэўтычным прадпрыемстве «Націвіта» ў Бешанковіцкім раёне і праекце па ўтылізацыі і перапрацоўцы электраабсталявання, які рэалізуецца ААТ «Маналіт» і славацкай кампаніяй BOMAT у Аршанскім раёне, наладжана эфектыўнае ўзаемадзеянне. У ходзе перамоваў абмяркоўваліся тэхнічныя дэталі і прапрацоўваліся магчымыя схемы фінансавання перспектыўных прапаноў аб супрацоўніцтве.

У прыватнасці, патэнцыйныя партнёры разглядаюць варыянт будаўніцтва Бешанковіцкай ГЭС цалкам за кошт сродкаў інвестара (аб'ём укладанняў ацэньваецца ў 130 млн долараў) з наступнай эксплуатацыяй на працягу тэрміну акупнасці, пасля чаго перададуць яе ў сістэму Віцебскэнерга. Яшчэ адзін варыянт прадугледжвае стварэнне сумеснага прадпрыемства.

Славацкія інвестары гатовыя падключыцца да ўзвядзення смеццеперапрацоўчага завода ў Віцебскім раёне. На дадзеным этапе прапрацоўваюцца схемы наступнага выкарыстання цеплавой энергіі, атрыманай пры спальванні смецця. У якасці альтэрнатывы разглядаецца магчымасць арганізацыі смеццесартавальнага прадпрыемства за кошт прамых замежных інвестыцый.

Два праекты ініцыяваны славацкімі партнёрамі. Адзін з іх уключае стварэнне ў партнёрстве з ААТ «Віцязь» сумеснага прадпрыемства па вытворчасці святлодыёдныхламп. Другое прапанова з сферы дрэваапрацоўкі, да рэалізацыі якога гатовыя далучыцца інвестары з Германіі і Польшчы. Акрамя таго, асобнай тэмай перамоваў стала супрацоўніцтва ў сельскагаспадарчай сферы.

– Славацкая дэлегацыя праявіла цікавасць да комплекснай праграмы мадэрнізацыі жывёлагадоўлі на Віцебшчыне, якая прадугледжвае ўзвядзенне 15 рабатызаваных малочнатаварных ферм, 4 свінарэпрадуктары, а таксама стварэнне вытворчасці мяса трусоў, – адзначыў Алег Мацкевіч. Гэтыя прапановы ўключаны ў парадак дня афіцыйнага візіту прэм'ер-міністра Беларусі Андрэя Кобякава ў Славакію, які праходзіць у гэтыя дні.

Дэлегацыя правінцыі Шаньдун прыехала на Віцебшчыну не толькі з прапановамі аб аднаўленні пабрацімскіх сувязяў, якія ўстаноўлены паміж рэгіёнамі ў 2005 годзе, але і пашырэнні эканамічных кантактаў.

У ходзе прыёму ў аблвыканкаме кіраўнік кітайскай дэлегацыі намеснік начальніка канцылярыі знешніх сувязяў правінцыі Шаньдун Лі Жун падкрэсліла, што кітайскі бок гатовы наладжваць кантакты ў культурнай і адукацыйнай сферах, а таксама намяраецца садзейнічаць устанаўленню партнёрства ў эканоміцы, у тым ліку за кошт рэалізацыі доўгатэрміновых праектаў. У ліку канкрэтных напрамкаў эканамічнага супрацоўніцтва прадстаўнікі Паднябеснай прапанавалі вырошчванне і перапрацоўку лекавых раслін.

Па словах намесніка старшыні аблвыканкама Алега Мацкевіча, Віцебшчына гатова да супрацоўніцтва з кітайскімі партнёрамі па стварэнні мультымадальнага транспартна-лагістычнага цэнтра ў Аршанскім раёне.

– На пляцоўцы у Балбасава плануецца стварыць вытворчасць тавараў, так што мы спадзяемся, што прадстаўнікі правінцыі Шаньдун зацікавяцца гэтым праектам, – адзначыў намеснік старшыні аблвыканкама.

Акрамя таго, перспектыўнымі напрамкамі ўзаемадзеяння могуць стаць сельская гаспадарка, у прыватнасці, агародніцтва, пажыўныя глебы, а таксама навуковае суправаджэнне аграрнай галіны ў цэлым. Шаньдун адносіцца да ліку найбольш эканамічнаразвітых правінцый Кітая, з'яўляецца другой па колькасці насельніцтва (97 млн чалавек).

На думку Алега Мацкевіча, неабходна задзейнічаць патэнцыял супрацоўніцтва, паколькі пакуль даўгачасных кантрактаў не толькі з гэтай правінцыяй, але і з іншымі кітайскімі рэгіёнамі ў вобласці няшмат. Па выніках 2016 года аб'ём таваразвароту склаў 48 млн долараў, у тым ліку экспартавана тавараў на 6,8 млн долараў.               

Сяргей Антонаў. Фота Антона Сцепанішчава. «Віцебскія вясці».