Дэлегацыя Віцебскай вобласці прыме ўдзел у 50-й сустрэчы ветэранаў трох краін на Кургане Дружбы

29 ліпеня, Віцебск /Сяргей Кочатаў - БЕЛТА/. Дэлегацыя Віцебскай вобласці 4-5 ліпеня прыме ўдзел у 50-й сустрэчы ветэранаў Вялікай Айчыннай вайны на Кургане Дружбы на мяжы Беларусі, Расіі і Латвіі, паведаміў карэспандэнту БЕЛТА старшыня Віцебскага абласнога Савета дэпутатаў Аляксандр Ацясаў. У складзе віцебскай дэлегацыі будзе больш за 100 ветэранаў партызанскага руху і падпольшчыкаў. Афіцыйную дэлегацыю рэгіёна ўзначаліць старшыня аблвыканкама Аляксандр Косінец. Сёлета прымаючым бокам выступае Расія, асноўныя ўрачыстасці пройдуць на тэрыторыі Себежскага раёна Пскоўскай вобласці. Па традыцыі 5 ліпеня мерапрыемства пачнецца з шэсця калон ветэранаў з тэрыторый трох краін па сцежках да Кургана Дружбы. На ўрачыстым мітынгу ўдзельнікі сустрэчы ўспомняць баявых таварышаў, ушануюць іх памяць хвілінай маўчання, ускладуць вянкі і кветкі да воінскіх помнікаў. Перад ветэранамі выступяць Ансамбль песні і танца Ленінградскай ваеннай акругі, творчыя калектывы Пскоўскай і Віцебскай абласцей. Завершыцца памятная сустрэча вечарам успамінаў каля імправізаванага партызанскага вогнішча. Акрамя таго, 4 ліпеня запланавана правядзенне міжнароднага антыфашысцкага форуму "Абаронім памяць аб Вялікай Перамозе!". На форуме пройдуць мітынг, круглы стол, фотавыстава. Віцябляне падрыхтавалі прэзентацыю кнігі аб гісторыі Кургана Дружбы "Братэрства. Мужнасць. Памяць". Маляўнічае выданне будзе ўручана ўсім удзельнікам мерапрыемства. Расійская дэлегацыя прадставіць відэафільм "Кургану Дружбы - 50!". На форум плануюць прыбыць актывісты антыфашысцкіх клубаў Латвіі і Эстоніі. Усяго ў юбілейнай сустрэчы ветэранаў трох краін чакаецца ўдзел больш за 1 тыс. чалавек. Курган Дружбы быў насыпан у 1959 годзе на мяжы Беларусі, Расіі і Латвіі ў гонар баявога садружнасці партызан і падпольшчыкаў. Зямля для кургана ўзята з магіл партызан і воінаў Чырвонай Арміі, якія аддалі жыццё за Радзіму. На яго вяршыні расце дуб як сімвал непарушнай дружбы трох народаў. У курган умантаваны тры гранітныя пліты, на якіх на трох мовах напісана: "Курган Дружбы узведзены на стыку межаў трох братніх рэспублік у гонар баявой дружбы, змацаванай крывёю ў гады Вялікай Айчыннай вайны рускіх, беларускіх і латышскіх партызан. Адкрыты 3 ліпеня 1959 года". Ад кургана пракладзены тры алеі: у бок Беларусі - бярозавая, Расіі - кляновая, Латвіі - ліпавая. У канцы бярозавай алеі на тэрыторыі Верхнядзвінскага раёна (Віцебская вобласць) размешчаны мемарыяльны музей, экспазіцыя якога прысвечана партызанскаму руху.-0-