Дэлегацыя Віцебскай вобласці прыняла ўдзел у VII еўрапейскім эканамічным форуме ў польскім горадзе Лодзь

Адпаведную запрашэнне жыхары Віцебшчыны атрымалі ад кіраўніцтва Лодзьскага ваяводства, з якім у Прыдзвінне дзейнічае дамова аб супрацоўніцтве з 2000 года. Узначаліў дэлегацыю намеснік старшыні аблвыканкама Алег Мацкевіч (на фота). У яе склад увайшлі прадстаўнікі абласнога ўпраўлення па наглядзе за рацыянальным выкарыстаннем паліўна-энергетычных рэсурсаў, УП «Віцебскаблгаз», ККУП «Віцебскі абласны цэнтр маркетынгу». Прэзентацыя інвестыцыйнага патэнцыялу рэгіёна, прасоўванне інавацыйных праектаў і прадуктаў, прыцягненне замежных інвестараў на Віцебшчыну, устанаўленне дзелавых кантактаў з замежнымі партнёрамі, абмен вопытам і прасоўванне ідэй у сферы энергазберажэння, будаўніцтва, медыцыны, падтрымка малога і сярэдняга прадпрымальніцтва – пытанні, якія цікавілі нашу дэлегацыю. У форуме прынялі ўдзел прадстаўнікі Украіны, Латвіі, Літвы, Германіі, Балгарыі, шэрагу краін афрыканскага кантынента.

Галоўнай тэмай стала развіццё энергетыкі, уключаючы аднаўляльныя крыніцы энергіі. Акрамя таго, былі разгледжаны пытанні, якія тычацца інавацыйнай тэкстыльнай прамысловасці і моднай індустрыі, паляпшэння аўтсорсінгу бізнес-працэсаў, медыцыны, фармацэўтыкі, касметалогіі, інавацыйнай сельскай гаспадаркі і харчовай прамысловасці. Падчас форуму праходзілі тэматычныя секцыі, дыскусійныя платформы, пленарныя пасяджэнні.

У рамках аднаго з іх з дакладам аб развіцці таваразвароту паміж Еўрасаюзам і Рэспублікай Беларусь і магчымых формах падтрымкі прадпрымальнікаў блізкага і далёкага замежжа выступіў Алег Мацкевіч. Акрамя таго, кіраўнік нашай дэлегацыі правёў перамовы з маршалам Лодзьскага ваяводства Вітольдам Стыпейнем па пытаннях далейшага супрацоўніцтва і інтэграцыі Віцебскага і Лодзьскага рэгіёнаў у рамках адзінай эканамічнай прасторы Еўразійскага эканамічнага саюза.

Віцебшчына – Польшча

Як паведамілі ва ўпраўленні інвестыцыйнай палітыкі і знешнеэканамічных сувязяў камітэта эканомікі аблвыканкама, штогадовы таваразварот Віцебскай вобласці з Польшчай складае каля 140 млн долараў, маецца вялікі патэнцыял для павелічэння гэтай лічбы. Па выніках 8 месяцаў 2014 года таваразварот склаў 101,3 млн дал. і вырас у параўнанні з аналагічным перыядам мінулага на 40%. Экспартавана прадукцыі на 66 млн дал. Аснову экспарту складае звадкаваны газ, таксама пастаўляюцца тавары хімічнай прамысловасці: палімеры этылену, кокс і нафтавы бітум, шклавалакно. Актыўна ідуць у суседнюю краіну казеін, паліўная драўніна, пліты ДВП, ільняныя тканіны, станкі, оптыка.

На працягу апошніх некалькіх гадоў з Польшчы імпартаваліся садавіна, палімеры прапілену, лекавыя сродкі, харчовыя прадукты, скура пасля першаснай апрацоўкі, трыкатажныя палотны, дэталі абутку, прычэпы, трактары, машыны і прамысловае абсталяванне.

Варта адзначыць, што ў вобласці рэалізуюцца інвестыцыйныя праекты з удзелам польскага капіталу, у тым ліку ў свабоднай эканамічнай зоне «Віцебск», ў асноўным па пашыве вырабаў і перапрацоўцы мяса.

Паміж гарадамі нашай вобласці і польскімі рэгіёнамі наладжана двухбаковае супрацоўніцтва, у прыватнасці, падпісаны дагаворы паміж Віцебскам і Зялёнай Гурай, Наваполацкам і Плоцкам, Полацкам і Ломжай, Глыбокім і Слупцай і інш. Віцебшчына таксама падтрымлівае дзелавыя кантакты з Падляскім, Паморскім і Заходнепаморскім ваяводствамі Польшчы.

Вольга Маслоўская, "Віцебскія весці"