Дзень ВДВ і спецаперацый адзначылі ў Віцебску

Сёлета Дзень дэсантнікаў і сіл спецыяльных аперацый Рэспублікі Беларусь (СА) у абласным цэнтры пачалі адзначаць з ускладання вянкоў і кветак да скульптурнай кампазіцыі «Дэсантнікам усіх пакаленняў» у парку Пераможцаў.

Пасля мітынгу вайскоўцы і іх папярэднікі прайшлі па вуліцы Калініна і праспекце Фрунзе да размяшчэння 103-й Віцебскай асобнай гвардзейскай паветрана-дэсантнай брыгады. Па ходзе запрашалі ўсіх жадаючых наведаць свята і выкрыквалі лозунгі «ВДВ — сіла!» і «Слава Маргелаву!».

На плацу злучэння правялі цырымонію ўзнагароджання выдатных салдат, прапаршчыкаў і афіцэраў узнагародамі і падзякамі мясцовай улады, камандавання СА і брыгады. Са святам усіх датычных павіншавалі старшыня аблвыканкама Аляксандр Субоцін, прадстаўнікі гарадской улады і камандавання сіл спецыяльных аперацый і злучэння.

Па завяршэнні афіцыйнай часткі прайшлі паказальныя выступленні, у тым ліку байцоў разведроты, было разыграна некалькі баявых эпізодаў. Напрыклад, гвардзейскае падраздзяленне прадэманстравала, што здольна аператыўна знішчыць незаконнае узброенае фарміраванне, якое ўварвалася ў краіну.

"Віцебскія весці", фота "БелТА"