Дыпламаты з каля 20 краін сабраліся ў Воршы, каб абмеркаваць перспектывы дзелавога і культурнага супрацоўніцтва

Арганізатарам візіту ў паўночны рэгіён нашай краіны выступіла Беларуская гандлёва-прамысловая палата, якая ўносіць вялікі ўклад у пашырэнне геаграфіі дзелавых і культурных кантактаў паміж дзяржавамі і ўмацаванне іміджу Беларусі на знешнім рынку. Паездка ў Воршу стала адным з крокаў на гэтым шляху.

Сярод удзельнікаў – дыпламатычныя прадстаўніцтвы Вялікабрытаніі, В'етнама, Ізраіля, Кітая, Японіі, Ірана, Кубы, Судана, Румыніі, Эквадора і іншых краін. У складзе дэлегацыі – намеснікі кіраўнікоў пасольстваў, гандлёвыя саветнікі, памочнікі паслоў, гандлёвыя аташэ, эксперты, а таксама прадстаўнікі міжнародных арганізацый.

Як паведамілі ва УП «Віцебскае аддзяленне БелГПП», праграма Дня гандлёвага саветніка была насычанай. Гасцей сустрэлі ў Аршанскім райвыканкаме, дзе адбыўся бізнес-брыфінг з прэзентацыяй эканамічнага і інвестыцыйнага патэнцыялу Віцебскай вобласці і аршанскага рэгіёну.

Акрамя таго, была арганізавана дэгустацыя прадукцыі мясцовых вытворцаў: малочнага, мясакансервавага камбінатаў, філіяла «Салодкая краіна» кандытарскага камбіната «Віцьба», філіяла «Аршанскі хлебазавод» ААТ «Віцебскхлебпрам» і іншых. Затым дыпламатаў чакала знаёмства з сучаснай вытворчасцю на Аршанскім льнокамбінаце і вырабамі з «беларускага шоўку».

Дзелавую частку Дня гандлёвага саветніка дапоўніла шырокая культурная праграма: ускладанне кветак да вечнага агню ля Кургана Славы ў Воршы, наведванне музейнага комплексу гісторыі і культуры, дачы Янкі Купалы ў Ляўках, Дома рамёстваў у Копысі, удзел у самабытным свяце «Александрыя збірае сяброў».

Вольга Маслоўская, «Віцебскія весці». Фота з адкрытых крыніц.