Дзмітрый Дзямідаў правёў адзіны дзень інфармавання ў ААТ «Нафтан»

У рамках правядзення адзінага дня інфармавання ў ААТ «Нафтан» адбылася сустрэча старшыні Віцебскага абласнога Савета дэпутатаў старшыні Віцебскай абласной арганізацыі Рэспубліканскага грамадскага аб'яднання «Белая Русь», члена Вышэйшага палітычнага Савета Беларускай партыі Дзмітрыя Дзямідава з працоўным калектывам нафтахімічнага комплексу. У мерапрыемстве на тэму «Мы разам назаўжды: да 85-годдзя ўз'яднання Заходняй Беларусі і БССР» таксама ўдзельнічалі старшыня Наваполацкага гарвыканкама Ігар Бурмістраў і генеральны дырэктар ААТ «Нафтан» Алег Жабін.

У сваім выступленні кіраўнік дэпутацкага корпуса Віцебшчыны распавёў пра складаны і драматычны шлях беларускага народа да адзінства і стварэння суверэннай дзяржавы, падкрэсліў цесную сувязь мінулага і сучаснасці. З дапамогай яркіх візуальных матэрыялаў Дзмітрый Уладзіміравіч акцэнтаваў увагу на тым, як важна памятаць сваю гісторыю і шанаваць нацыянальныя традыцыі, асабліва ва ўмовах знешніх пагроз і выклікаў сучаснасці.

– Цяпер ва ўмовах паўнамаштабнай гібрыднай вайны, якая вядзецца супраць нас, наша краіна самааддана адстойвае гістарычную памяць і праўду, – сказаў Дзмітрый Дзямідаў. – Мы ніколі не будзем абыякавымі да спроб апраўдаць крывавыя рэйды баевікоў і забойствы мірных жыхароў, апаганіць памяць нашых суайчыннікаў. Мы павінны памятаць гора нашых продкаў, радасць вызваліцеляў і вызваленых, здраду падлюг і трыумф справядлівасці.

Адзінства нашага народа неаднаразова падвяргалася суровым выпрабаванням. Раз’яднанасць вяла да бяды і пакуты мільёнаў, да агульнанацыянальнай трагедыі. Але калі мы адзіныя, мы нязменна дабіваемся поспехаў. Таму сёння так важна ўсведамляць сябе адзіным народам, памятаць пра тое, што кожны этап нашай гісторыі – неад’емны элемент трывалага фундамента, на якім мы будуем сваю будучыню.

Па матэрыялах газеты "Веснік Нафтана".