«Дняпроўскія галасы» прагучаць 27 чэрвеня ў Віцебскай вобласці

24 чэрвеня, Мінск /Уладзімір Васількоў - БЕЛТА/. У Дубровне Віцебскай вобласці 27-28 чэрвеня пройдзе ХVІ Міжнародны фестываль песні і музыкі Подзвіння Расіі, Беларусі і Украіны "Дняпроўскія галасы ў Дуброўне". Як паведаміў карэспандэнту БЕЛТА прэс-сакратар Апарата Упаўнаважанага па справах рэлігій і нацыянальнасцей Міхаіл Рыбакоў, сёлета фестываль прысвячаецца 65-годдзю вызвалення Беларусі ад нямецка-фашысцкіх захопнікаў. Удзел у фестывалі прымуць шматлікія госці і творчыя калектывы Беларусі (як з самой краіны, так і прадстаўнікі беларускай дыяспары), Украіны, Літвы, Латвіі, Польшчы, Эстоніі, Славакіі, а таксама Рэспублікі Татарстан і заходніх рэгіёнаў Расіі. "Беларусь стала для многіх нацыянальнасцей родным домам. Традыцыі мірнага супрацоўніцтва гэтасных у нашай краіне ўзведзены ў ранг дзяржаўнай палітыкі. Нам няма чаго дзяліць, але ёсць чым дзяліцца, і сустракаючы гасцей, краіна працягвае руку дружбы ўсім людзям добрай волі", - адзначыў Міхаіл Рыбакоў. Праграма свята таксама прадугледжвае дзелавыя сустрэчы кіраўніцтва раёна з прадстаўнікамі адміністрацый замежных рэгіёнаў на прадмет далейшага партнёрскага супрацоўніцтва ў сферах культуры, эканомікі, адпачынку і турызму. У ходзе мерапрыемстваў фестывалю адбудзецца ўручэнне падзячных грамат і каштоўных прызоў Упаўнаважанага па справах рэлігій і нацыянальнасцей кіраўніцтву Дубровенскага раёна за паспяховы ўдзел у рэалізацыі праекта "Адміністрацыйны рэгіён Беларусі - арганізацыя суайчыннікаў за мяжой" і рэдакцыі раённай газеты "Дняпроўская праўда" за актыўнае асвятленне пытанняў міжнацыянальных і міжканфесійных адносін, міжкультурнага дыялогу і супрацоўніцтва з суайчыннікамі за мяжой. Прадстаўнікі Татарстана ў памяць аб сваім земляку кампазітары Фарыдзе Яруліне, які загінуў пры вызваленні раёна і пахаваны на мемарыяльным комплексе "Рыленкі", ускладуць кветкі і зямлю Татарстана на магілу героя. Міжнароднае грамадскае аб'яднанне "Татарска-башкірская культурная спадчына "Чышма" перадасць у дар раённай бібліятэцы падборку кніг для дзяцей і школьнікаў.-0-