Дагавор аб рэжыме беларуска-латвійскай дзяржграніцы падпісаны ў Віцебску
Дамова паміж урадамі Беларусі і Латвіі аб рэжыме беларуска-латвійскай дзяржаўнай мяжы падпісана ў Віцебску, перадае карэспандэнт БЕЛТА.
З беларускага боку дакумент падпісаў старшыня Дзяржпагранкамітэта Аляксандр Боечка, з латвійскага - начальнік Дзяржаўнай памежнай аховы Нормундс Гарбарс.
Як паведамілі ў Дзяржпагранкамітэце, дамова ўстанаўлівае парадак утрымання дзяржаўнай мяжы, яе перасячэння асобамі і транспартнымі сродкамі, перамяшчэння грузаў, тавараў, а таксама урэгулявання памежных інцыдэнтаў.
Бакі абавязуюцца ажыццяўляць гаспадарчую і іншую дзейнасць на дзяржмяжы і прыгранічнай тэрыторыі без шкоды для суседзячага боку, супрацоўнічаць у галіне аховы навакольнага асяроддзя і рацыянальнага выкарыстання прыродных рэсурсаў, весці сумесныя мерапрыемствы па прадухіленні экалагічных катастроф і стыхійных бедстваў.
Дакументам таксама вызначаны асноўныя напрамкі супрацоўніцтва памежных службаў. Для аператыўнага вырашэння пытанняў, звязаных з забеспячэннем рэжыму дзяржмяжы, і ўрэгулявання памежных інцыдэнтаў створаны інстытут памежных упаўнаважаных.
Будзе ўтворана супольная беларуска-латвійская камісія па пытаннях дзяржмяжы, на якую ўскладаюцца задачы па кантролі яе ўтрымання, арганізацыі праверак праходжання дзяржмяжы і каардынацыі дзейнасці кампетэнтных органаў дзяржаўнага кіравання па адпаведных пытаннях.
"Фактычна заключанай дамовай Беларусь і Латвія пацвярджаюць адсутнасць тэрытарыяльных пытанняў паміж дзвюма дзяржавамі і цяперашняе праходжанне дзяржаўнай мяжы на мясцовасці, вызначаюць парадак вырашэння пытанняў праходжання беларуска-латвійскай мяжы міжнародна-прававымі спосабамі", - адзначылі ў пагранведамстве.
Там таксама праінфармавалі, што двухбаковае супрацоўніцтва памежных службаў Беларусі і Латвіі актыўна развіваецца. У цяперашні час рэалізуецца сумесны праект "Павышэнне эфектыўнасці кіналагічных службаў памежных ведамстваў", які фінансуецца па лініі праграмы ЕС трансгранічнага супрацоўніцтва "Латвія - Літва - Беларусь". У планах развіццё праектаў міжнароднай тэхнічнай дапамогі і па іншых напрамках. Новыя магчымасці ў гэтай сферы ў тым ліку адкрывае падпісаны дагавор.
У 2012 годзе праз беларуска-латвійскую мяжу прапушчана 967 тыс. грамадзян (746 тыс. - замежнікі), 526 тыс. транспартных сродкаў. Затрымана 93 парушальнікі дзяржмяжы і 377 парушальнікаў памежнага рэжыму.