Доля МВТ у сістэме жыллёва-камунальнай гаспадаркі Віцебскай вобласці ў 2013 годзе перавысіць 67%

Доля мясцовых відаў паліва (МВП) у сістэме жыллёва-камунальнай гаспадаркі Віцебскай вобласці ў 2013 годзе перавысіць 67%. Такія параметры закладзены доўгатэрміновай падпраграмай "Малая энергетыка Віцебшчыны", паведамілі карэспандэнту БЕЛТА ў аддзеле энергетыкі і паліва аблвыканкама.

Падпраграма распрацавана з улікам патрабаванняў Дырэктывы №3 "Эканомія і беражлівасць - галоўныя фактары эканамічнай бяспекі дзяржавы". Яна накіравана на зніжэнне аб'ёмаў імпарту энерганосьбітаў, павелічэнне вытворчасці і экспартавання звадкаваных вуглевадародных газаў, захаванне фінансавых рэсурсаў, накіраваных на энергазабеспячэнне. Падпраграма прадугледжвае будаўніцтва ў вобласці энергетычных крыніц з выкарыстаннем мясцовых відаў паліва, а таксама альтэрнатыўных крыніц энергіі.

У сістэме ЖКГ у 2013 годзе каля Br149 млрд. будзе накіравана на энергазберажэнне. Сродкі інвестуюць у перавод 11 кацельняў на выкарыстанне мясцовых відаў паліва з механізаванай загрузкай, што дазволіць скараціць на працягу года спажыванне прыроднага газу на 14 млн.куб.м, павялічыць долю выкарыстання МВП у паліўным балансе з 55% на канец 2012 года да 67,8% да канца 2013-га. У сістэме аграпрамысловага комплексу на долю МВП у 2013 годзе прыйдзецца 28% ад агульнага паліўнага балансу. У цэлым па вобласці не менш за пятую частку ў кацельна-пячным паліве складзе доля МВП.

У адпаведнасці з падпраграмай "Малая энергетыка Віцебшчыны" у вобласці атрымаюць далейшае развіццё альтэрнатыўныя крыніцы энергіі. У цяперашні час вытворчасць электраэнергіі ажыццяўляюць 9 гідраэлектрастанцый агульнай устаноўленай магутнасцю 2,5 МВт. Вядзецца будаўніцтва каскада з чатырох ГЭС на рацэ Заходняя Дзвіна.

Гідраметэаралагічныя асаблівасці рэгіёна дазваляюць ажыццявіць тут будаўніцтва ветраэнергетычных установак. Патэнцыйным месцам для будаўніцтва ветрапарка адзінай магутнасцю больш за 1 тыс. кВт з'яўляецца пляцоўка ў Лёзненскім раёне. У падпраграме знайшло адлюстраванне і перспектыўны напрамак - замяшчэнне прыроднага газу біягазам. Такія ўстаноўкі могуць з'явіцца каля буйных жывёлагадоўчых комплексаў, на сметніках бытавых адходаў. Па прагнозах спецыялістаў, выкарыстанне мясцовых відаў паліўна-энергетычных рэсурсаў пры вытворчасці цеплавой і электрычнай энергіі дазволіць замясціць 88,6 тыс. т умоўнага паліва - імпартнага прыроднага газу.