Дом міласэрнасці пабудуюць у Віцебскай вобласці

Першы ў Віцебскай вобласці Цэнтр суправаджальнага пражывання для інвалідаў і пажылых грамадзян будзе пабудаваны ў аграгарадку Бычыха Гарадоцкага раёна. Пра гэта паведаміў старшыня камітэта па архітэктуры і будаўніцтве Віцебскага аблвыканкама Ігар Ісачанка на сесіі абласнога Савета дэпутатаў, перадае карэспандэнт БЕЛТА.

Рашэнне аб уключэнні ў інвестыцыйную праграму вобласці на бягучы год аб'екта "Цэнтр суправаджальнага пражывання для інвалідаў і пажылых грамадзян "Дом міласэрнасці" прынята на сесіі. Будаўніцтва будзе ажыццяўляцца на ахвяраванні юрыдычных і фізічных асоб з прыцягненнем сродкаў абласнога бюджэту.

У Доме міласэрнасці пад наглядам персаналу будуць пражываць інваліды і пажылыя грамадзяне, якія апынуліся ў складанай жыццёвай сітуацыі (аддаленасць жылля, яго страта, непрыдатнасць для пражывання), а таксама грамадзяне, якія маюць патрэбу ў сацыяльна-працоўнай рэабілітацыі і аздараўленні ва ўмовах, максімальна набліжаных да хатніх.

У цэнтры прадугледжана арганізаваць вольны час (заняткі па інтарэсах, пасільная працоўная дзейнасць, навучанне камп'ютарнай пісьменнасці і г.д.), аказваць духоўную медыцынскую дапамогу сацыяльна ўразлівым катэгорыям насельніцтва, спалучаючы праваслаўныя традыцыі міласэрнасці і сучасныя тэхналогіі догляду, весці сацыяльна-дабрачынную дзейнасць. Акрамя гэтага, на базе цэнтра будзе арганізавана навучанне сучасным тэхналогіям догляду як спецыялістаў, так і сваякоў цяжка хворых людзей.

Зараз у Гарадоцкім раёне пражываюць 1 тыс. 235 інвалідаў і 6 тыс. 493 грамадзяніна пажылога ўзросту, з якіх 514 з'яўляюцца адзінокімі.

Алена Ціханава