Сёлета ў Віцебскай вобласці адкрыюцца два дзіцячыя дома сямейнага тыпу

Два дзіцячыя дамы сямейнага тыпу адкрыюцца сёлета ў Віцебскай вобласці, паведамілі карэспандэнту БЕЛТА ва ўпраўленні адукацыі Віцебскага аблвыканкама.

Першым свае дзверы расчыніць дзіцячы дом сямейнага тыпу ў аграгарадку Ула Бешанковіцкага раёна. На ўзвядзенне аб'екта, пабудаванага па тыпавым праекце, затрачана звыш Br1,3 млрд з абласнога і рэспубліканскага бюджэтаў. Больш Br150 млн накіравана з раённага бюджэту на набыццё мэблі, гаспадарчага інвентару і іншых патрэбных у побыце рэчаў. На гэтыя мэты прыцягвалася таксама спонсарская дапамога, аказаная рознымі прадпрыемствамі, арганізацыямі, індывідуальнымі прадпрымальнікамі і прыватнымі асобамі.

Дом ужо гатовы прыняць сваіх жыльцоў. Звонкія галасы дзяцей напоўняць яго 6 сакавіка. Віншаваць дружную сям'ю новасёлаў - прыёмнага бацьку-выхавальніка Ірыну Адамовіч з больш чым 10-гадовым стажам працы на гэтай пасадзе, яе чацвярых прыёмных дзяцей і роднага сына - збяруцца прадстаўнікі мясцовых органаў улады, абласнога ўпраўлення адукацыі, спонсары.

У другім квартале такая ж радасная падзея адбудзецца ў Талачынскім раёне, дзе таксама на завяршальным этапе знаходзяцца работы па адкрыцці дзіцячага дома сямейнага тыпу.

Усяго з улікам гэтых двух у Віцебскай вобласці адкрыта 22 дзіцячыя дамы сямейнага тыпу. Будаўніцтва новых аб'ектаў сёлета запланавана ў Расонскім і Шаркаўшчынскім раёнах. Акрамя таго, працягваецца будаўніцтва дзіцячых дамоў за кошт сродкаў банкаўскіх устаноў у Віцебскім і Расонскім раёнах.

Усяго ў Віцебскай вобласці пражывае 3921 дзіця-сірата, тры чвэрці з іх выхоўваюцца ў замяшчальных сем'ях.

Вольга Багачова