У найбліжэйшыя гады ў Віцебску з'явяцца два новыя музеі
Два новых музея з'явяцца ў найбліжэйшыя гады ў Віцебску. Пра гэта паведаміў сёння на адкрыцці міжнароднай адукацыйна-культурна-забаўляльнай канферэнцыі "Арт-Лімуд Беларусь" намеснік старшыні Віцебскага аблвыканкама Уладзімір Цярэнтаў, перадае карэспандэнт БЕЛТА.
Ужо замоўлена праектна-каштарысная дакументацыя па стварэнні асобнага музея, прысвечанага выдатнаму майстру Юдэлю Пэну. Акрамя таго, зараз у горадзе вядзецца рэстаўрацыя будынка былога Віцебскага народнага мастацкага вучылішча, дзе працаваў Марк Шагал. Завяршыць будаўнічыя работы на гэтым аб'екце плануецца да канца года. Пасля тут таксама плануецца стварыць музей.
"Вельмі многае робіцца для таго, каб наша спадчына сапраўды была агульнай не толькі ўчора, але і сёння, заўтра. Як кажуць, без мінулага няма будучыні. Мы памятаем сваё мінулае, а таму ў нас ёсць і сучаснасць, і будучыня", - заключыў Уладзімір Цярэнтаў.
Міжнародная адукацыйна-культурна-забаўляльная канферэнцыя "Арт-Лімуд Беларусь", прысвечаная творчасці, культуры і мастацтву, праходзіць у Віцебску з 31 мая па 2 чэрвеня. У ліку яе ўдзельнікаў - каля 500 чалавек з усіх рэгіёнаў Беларусі, а таксама з Украіны, Расіі, Малдовы, Ізраіля, Літвы, ЗША і іншых краін. Праект праводзіцца ў Беларусі ўпершыню ў рамках міжнароднага адукацыйнага праекта "Лімуд-СНД" для яўрэйскай рускамоўнай моладзі, якая жыве на прасторах былога СССР.
Генеральны партнёр канферэнцыі - Саюз беларускіх яўрэйскіх грамадскіх аб'яднанняў і абшчын. Сярод партнёраў таксама пасольства Дзяржавы Ізраіль у Беларусі, Віцебскі аблвыканкам, Віцебскі гарвыканкам, прадстаўніцтва Амерыканскага яўрэйскага аб'яднанага размеркавальнага камітэта "Джойнт" у Беларусі, Рэлігійнае аб'яднанне абшчын прагрэсіўнага іудаізму ў Беларусі і інш.