Дзве студэнткі ВДУ імя П.М. Машэрава прадставяць Віцебскую вобласць на конкурсе «Міс Беларусь». Хварэем за нашых!

Студэнткі Віцебскага дзяржаўнага ўніверсітэта Марына Сцяпанава (мастацка-графічны факультэт) і Юлія Мішчанка (факультэт фізічнай культуры і спорту) прымуць удзел у фінале XII Нацыянальнага конкурсу прыгажосці «Міс Беларусь», які адбудзецца 10 верасня ў Рэспубліканскім цэнтры алімпійскай падрыхтоўкі па гульнявых відах спорту «Палац спорту». Дарэчы, Марына Сцяпанава – віцяблянка, Юлія Мішчанка родам з Росанаў.

Як паведаміла карэспандэнту «Віцебскіх вестак» прарэктар па выхаваўчай рабоце ВДУ імя П.М. Машэрава Юлія Бежанарь, з абедзвюма студэнткамі яны пастаянна падтрымліваюць сувязь, дзяўчаты ў захапленні ад узроўню падрыхтоўкі да нацыянальнага конкурсу. Ужо прайшла рэпетыцыя ў касцюмах.

«Мы рады, што дзве нашы студэнткі выйшлі ў фінал і ўскладаем на іх вялікія надзеі, – кажа Юлія Пятроўна. – Вялікую падтрымку ў падрыхтоўцы да конкурсу ім аказаў і ВНУ, і ўпраўленне культуры Віцебскага аблвыканкама. 10 верасня на трох аўтобусах у Мінск адправяцца групы падтрымкі ад факультэтаў, дзе вучацца дзяўчаты, і ад БРСМ. Несумненна, паедзе і наш рэктар Валянціна Багатырэва».

Кампетэнтнае журы, у склад якога ўвойдуць зоркі мастацтва, моды і спорту, абярэ самую прыгожую беларуску. Менавіта яна, адзіная і непаўторная, прадставіць нашу краіну на конкурсе "Міс свету".

Арганізатарамі Нацыянальнага конкурсу з'яўляюцца Міністэрства культуры Рэспублікі Беларусь і Нацыянальная школа прыгажосці.

"Віцебскія весці".