Дванаццаць прадпрыемстваў Віцебска ўдвая зніжаюць гандлёвыя надбаўкі для малазабяспечаных грамадзян

8 верасня, Віцебск /Вольга Багачова - БЕЛТА/. Дванаццаць прадпрыемстваў Віцебска ўдвая зніжаюць гандлёвыя надбаўкі на сацыяльна значныя тавары для малазабяспечаных катэгорый грамадзян - пенсіянераў, інвалідаў I і II груп, шматдзетных сем'яў, паведамілі карэспандэнту БЕЛТА ў аддзеле гандлю і паслуг Віцебскага гарвыканкама.

Трое з уключаных у пералік магазінаў ужо ўкаранілі "сістэму лаяльнасці". Так, у ААТ "Віцебскі ўнівермаг" штодня з 9.00 да 12.00 шматдзетныя сем'і могуць набыць са зніжанай у 2 разы гандлёвай надбаўкай бялізну (швейную), бялізнавыя трыкатажныя вырабы для нованароджаных і дзяцей ясельнага ўзросту, панчошна-шкарпэткавыя вырабы для дзяцей, вучнёўскія сшыткі, санітарна-гігіенічныя вырабы з паперы для дзяцей, мыла і крэм-мыла туалетнае, сінтэтычныя мыйныя сродкі айчыннай вытворчасці.

У магазіне ЗАТ "Гандлёвы дом "ШагоВіта" па вуліцы Леніна аналагічная зніжка прадастаўляецца шматдзетным сем'ям штодня з 10.00 да 12.00 на абутак для дзяцей ясельнага ўзросту і малалетніх. У магазіне "Ніка-10" ААТ "Ніка ( вул.Гагарына, 156А)" названыя катэгорыі грамадзян штодня з 8.00 да 12.00 могуць купіць сацыяльна значныя харчовыя тавары: малако, кефір, смятану, тварог, сухія малочныя сумесі і мясныя кансервы для дзіцячага харчавання, муку пшанічную, крупы, макаронныя вырабы, яйка курынае, сметанковае масла, сланечнікавы або рапсавы алей, агароднінныя, фруктова-ягадныя, плодаагароднінныя кансервы і сокі для дзіцячага харчавання.

З сярэдзіны верасня ў "сістэму лаяльнасці" ўключацца таксама магазіны №65, №83, №128, №149 ААТ "Веста"; магазін №20, №30, №34 ААТ "Віцебскія прадукты"; універсам СЗАТ "Фірма "Амега" ( вул. Караткевіча, 24), магазін "Ганна-3" Віцебскай бройлернай птушкафабрыкі.

Распараджэнне Віцебскага гарвыканкама прынята ў мэтах падтрымкі сацыяльна неабароненых слаёў насельніцтва. Гандлёвае абслугоўванне грамадзян, якія падпадаюць пад яго дзеянне, ажыццяўляецца па прад'яўленні дакумента, які пацвярджае гэта. Усяго "сістэмай лаяльнасці" ў Віцебску ўжо ахоплена каля 30 аб'ектаў - магазінаў, прадпрыемстваў бытавых паслуг, грамадскага харчавання.-0-