Палац водных відаў спорту ці аквапарк могуць з'явіцца ў Віцебску
Будаўніцтва Палаца водных відаў спорту або аквапарка, а таксама шэрагу іншых аб'ектаў спартыўнай і турыстычнай інфраструктуры прадугледжвае дэталёвы план грамадска-жылой забудовы адной з цэнтральных частак Віцебска, паведамілі карэспандэнту БЕЛТА у КУП "Сталічнае будаўніцтва горада Віцебска".
Праектуемы ўчастак агульнай плошчай амаль 5 га размешчаны ў межах вуліц Даватара, Разіна, Працы і праспекта Люднікава. Яго асваенне прадугледжана генеральным планам развіцця Віцебска. Тут мяркуецца пабудаваць каля 52,5 тыс. кв.м жылой плошчы (760 кватэр), у выніку насельніцтва мікрараёна павялічыцца амаль напалову да 4 тыс. чалавек. Акрамя жылля, у мікрараёне запраектавана ўзвядзенне аб'екта сацыяльнага абслугоўвання (пакуль размова ідзе пра школу з блокам пачатковых класаў, але, магчыма, яго дапоўніць дзіцячы сад), буйнога гандлёвага цэнтра, гандлёвых і офісных памяшканняў, спартыўна-турыстычнага комплексу, гасцініцы, аптэкі, аўтадрома і ціра, а таксама двухпавярховых паркінгаў для транспарту. Што тычыцца Палаца водных відаў спорту або аквапарка, то ў раёне зямельны ўчастак прадугледжаны і пад такі аб'ект, але больш пэўна пра яго прызначэнне можна будзе гаварыць пасля прыцягнення інвестара, адзначылі на прадпрыемстве.
Будуць вырашаны транспартныя праблемы ў цэнтральнай частцы горада за кошт будаўніцтва працягу вуліцы Баўмана з выхадам на праспект Люднікава, а таксама арганізацыі новых транспартных сувязей і пад'язных шляхоў. Акрамя таго, у раёне будзе выкананы вялікі аб'ём работ па добраўпарадкаванні ў паркавай зоне, якая прымыкае да Віцебскай дзяржаўнай акадэміі ветэрынарнай медыцыны, з выхадам на раку Віцьбу.
Па папярэдніх даных, праект мяркуецца рэалізаваць да 2021 года ў два этапы. Першы этап разлічаны да 2017 года і прадугледжвае ўзвядзенне жылля і дарогі па вул. Баўмана.
План забудовы гэтай тэрыторыі прадстаўлены на грамадскае абмеркаванне, якое працягнецца да 7 жніўня. Далей ён будзе накіраваны на экалагічную і пазаведамасную экспертызы, пасля праходжання якіх і будзе зацверджаны. Да наступнага этапу - распрацоўкі будаўнічага праекта - мяркуецца прыступіць у чацвёртым квартале 2014 года.