Эфект ад рэалізацыі праграмы развіцця Аршанскага раёна ёсць - Раман Галоўчанка
Згодна з праектам, Аршанскаму раёну былі прадастаўлены беспрэцэдэнтныя меры падтрымкі, якія закліканы стымуляваць развіццё ва ўсіх сферах дзейнасці. "Сёння трэба комплексна разгледзець, як спрацавала схема, як магчымасцямі скарысталіся на месцах. Пэўныя вынікі ёсць: 163 мерапрыемствы рэалізаваны за палову тэрміну. На іх фінансаванне накіравана Br1,4 млрд - 80% ад плана на 2018-2020 гады", - сказаў кіраўнік урада.
Раман Галоўчанка адзначыў, што не ўсе праекты рэалізуюцца ў тэрмін. На гэта ўплываюць аб'ектыўныя і суб'ектыўныя прычыны. "Эфект ад рэалізацыі праграмы развіцця, безумоўна, ёсць. 82% з тых мерапрыемстваў, якія павінны былі быць выкананы за мінулыя два гады, ажыццёўлены. Па астатніх 18% ёсць адставанні, у асноўным у сектары прамысловага комплексу і сельскай гаспадаркі, - сказаў ён. - Мы абмяркуем кожны праект, каб знайсці праблемы і вырашыць іх".
На думку кіраўніка ўрада, асобныя мерапрыемствы падпраграм па прамысловым і аграпрамысловым комплексе, а таксама лясной гаспадарцы наўрад ці можна назваць паспяховымі. У прамысловасці праекты фінансава ёмістыя, і не асвойваюцца ў поўным аб'ёме сродкі. У АПК і лясной гаспадарцы асноўныя мерапрыемствы ідуць з адставаннем па тэрмінах. Сярод іх інвестпраекты на "Оршааграпраммашы", мясакансервавым камбінаце і Аршанскім інструментальным заводзе.
"Адзін праект (па арганізацыі вытворчасці сучаснага металарэжучага і дапаможнага інструменту з укараненнем інавацыйных тэхналагічных працэсаў. - Заўв. БЕЛТА) на Аршанскім інструментальным заводзе выбіўся з тэрмінаў. Тут шмат прычын. Гэта не простая мадэрнізацыя вытворчасці, закупка новага абсталявання або некалькіх станкоў. Гэта сур'ёзны праект з кампаніяй сусветнага ўзроўню Walter па вытворчасці ў Беларусі абсталявання высокай якасці. Больш часу спатрэбілася, каб дасягнуць дамоўленасці з нямецкім партнёрам, яны доўга ацэньвалі, ці ўступаць у гэты праект. Таксама каранавірус наклаўся, і тэрміны зрушыліся. Мы разабраліся ў гэтым пытанні з Міністэрствам прамысловасці, кіраўніцтвам прадпрыемства: ёсць упэўненасць, што на заводзе ўкладзуцца ў тэрмін - 2023 год", - растлумачыў Раман Галоўчанка.
Таксама прэм'ер-міністр наведаў адзін з аб'ектаў, які будуецца па праграме развіцця Аршанскага раёна. Гэта рабатызаваны малочна-таварны комплекс на 2 тыс. галоў надойнага статка паблізу вёскі Чурылава. "Гэта інавацыйны аб'ект з унікальнымі тэхналогіямі. Яго ўвялі ў эксплуатацыю 30 чэрвеня. Сёння мы больш абмяркоўвалі пытанні, як вярнуць інвестыцыі, укласціся ў параметры бізнес-планаў, таму што ўкладзены вялікія грошы і аддача чакаецца такая ж. Я выказаў асцярожнасць з нагоды падрыхтоўкі кадраў, выканання тэхналогій", - дадаў кіраўнік урада.
Сёння ў Оршы праходзіць выязное пасяджэнне Прэзідыума Савета Міністраў па рэалізацыі праграмы развіцця Аршанскага раёна да 2023 года. Удзельнікі абмяркуюць праблемныя моманты, магчымую карэкціроўку праграмы, аднак без выхаду за першапачатковыя часавыя рамкі і фінансавыя аб'ёмы.