Эфектыўную сістэму стымулявання працы неабходна стварыць у Віцебскай вобласці - Н.Дамашкевіч

12 кастрычніка, Віцебск /Вольга Багачова - БЕЛТА/. У Віцебскай вобласці неабходна распрацаваць эфектыўную сістэму стымулявання працы. Такую задачу паставіў сёння перад кіраўнікамі рэгіёнаў вобласці і ведамстваў памочнік Прэзідэнта Беларусі - галоўны інспектар па Віцебскай вобласці Мікалай Дамашкевіч на каардынацыйным нарадзе па барацьбе са злачыннасцю і карупцыяй, перадае карэспандэнт БЕЛТА. Па яго словах, разам з прафсаюзамі кіраўнікі ведамстваў павінны ў бліжэйшы час распрацаваць меры маральна-матэрыяльнага заахвочвання работнікаў за высокія вынікі вытворчай дзейнасці і дасягненні ў працы, якія сапраўды змогуць зацікавіць людзей лепш працаваць, выконваць вытворчую дысцыпліну і няўхільна выконваць свае абавязкі. "На сённяшні дзень дзейснай сістэмы стымулявання працы ў вобласці не назіраецца", - сказаў Мікалай Дамашкевіч. Па яго словах, пра гэта сведчыць паўсюдна распаўсюджанае п'янства і разгільдзяйства сярод работнікаў аграпрамысловага комплексу, безадказнае стаўленне да рабочай тэхнікі і матэрыялаў у будаўнічай галіне, бяздзейнасць чыноўнікаў на месцах, а таксама значная колькасць крадзяжоў. У агульнай структуры злачынстваў іх удзельная вага па выніках дзевяці месяцаў складае больш за 70%. Усяго за студзень-верасень у вобласці было здзейснена звыш 7 тыс. такіх правапарушэнняў, большасць з якіх звязана з замахам на дзяржаўную маёмасць. "Неабходна стварыць умовы, каб людзі імкнуліся эфектыўна працаваць, тады і пракуратуры з міліцыяй менш працы будзе, і эканоміка падцягнецца", - лічыць памочнік Прэзідэнта.-0-