Алена Ваенга адкрыла праграму на галоўнай пляцоўцы «Славянскага базару».

Алена Ваенга адкрыла праграму канцэртных мерапрыемстваў на галоўнай пляцоўцы "Славянскага базару". Сольны канцэрт папулярнай расійскай спявачкі адбыўся ўвечары 9 ліпеня ў Летнім амфітэатры.

Артистка прадставіла віцебскай публіцы праграму "Лена", у якой прагучалі новыя аўтарскія творы, а таксама шырока вядомыя і любімыя гледачамі песні. Акрамя сваіх кампазіцый Алена Ваенга выканала песню "Мы на лодочке катались" з рэпертуару легендарнай Лідзіі Русланавай. Артистка прызналася, што ў яе ёсць творчыя арыенціры, сярод якіх выдатныя рускія спявачкі Русланава і Зыкіна. Акрамя іх Ваенга згадала расійскага рок-музыканта Вячаслава Бутусава і нават выканала куплет з яго песні.

У адрозненне ад папярэдняга выступлення на "Славянскім базары", якое адбылося два гады таму, Алена Ваенга менш размаўляла і больш спявала, чым, безумоўна, парадавала сваіх прыхільнікаў. Усе песні знаходзілі цёплы водгук у зале, публіка падпявала і ад душы апладзіравала. Падчас зносін з глядзельнай залай Алена Ваенга распавяла аб галоўным змяненні ў жыцці - у яе нарадзіўся сын. Яму яна прысвяціла некалькі песень і прачытала кранальны верш. З удзячнай віцебскай публікай спявачка развіталася незадоўга да паўночы.

У рамках XXII Міжнароднага фестывалю "Славянскі базар у Віцебску" на сцэне Летняга амфітэатра адбудзецца каля 20 канцэртных праграм. Усяго ж на фестывалі пройдзе больш за 60 мерапрыемстваў - канцэртаў, спектакляў, кінапаказаў, выстаў, прэзентацый. У форуме прымаюць удзел артысты з 31 краіны: Аўстраліі, Арменіі, Беларусі, Бельгіі, Балгарыі, Босніі і Герцагавіны, Вялікабрытаніі, Венесуэлы, Германіі, Грузіі, Даніі, Ізраіля, Італіі, Казахстана, Кубы, Латвіі, Літвы, Македоніі, Малдовы, Польшчы, Расіі, Румыніі, Сербіі, Славеніі, Узбекістана, Украіны, Фінляндыі, Францыі, Харватыі, Чэхіі, Эстоніі.

Алена Ціханава, БЕЛТА