Энергетыкі Беларусі і Расіі правядуць вучэнні ў Аршанскім раёне
Энергетыкі Беларусі і Расіі правядуць сумесныя вучэнні ў Аршанскім раёне. Мерапрыемства будзе праходзіць з 14 па 16 жніўня на базе філіяла "Аршанскія электрычныя сеткі" РУП "Віцебскэнерга", паведамілі ў РУП "Віцебскэнерга".
Да ўдзелу ў вучэнні прыцягнуты мабільныя падраздзяленні "Віцебскэнерга", "Магілёўэнерга" і філіяла ПАТ "МРСК Цэнтра" - "Смаленскэнерга". Тэмай стане ліквідацыя наступстваў масавых адключэнняў электрасетных аб'ектаў размеркавальных сетак энергасістэмы Віцебскай вобласці на тэрыторыі Дубровенскага раёна, выкліканых уздзеяннем небяспечных метэаралагічных з'яў, такіх як парывісты шквалісты вецер, моцныя ападкі, навальніца.
Асаблівая ўвага будзе накіравана на арганізацыю ўсебаковага ўзаемадзеяння мабільных сіл і сродкаў пры правядзенні аварыйна-аднаўленчых работ і аказанне ўзаемадапамогі пры ліквідацыі наступстваў тэхналагічных парушэнняў у электрасетным комплексе паміж арганізацыямі ДВА "Белэнерга" і ПАТ "Рассеці".
Сумесныя вучэнні мабільных падраздзяленняў энергетыкаў дзвюх краін праводзяцца з 2015 года ў адпаведнасці з пагадненнем аб стратэгічным супрацоўніцтве паміж "Белэнерга" і "Рассеці".