Энергетыкі аператыўна аднавілі электразабеспячэнне больш як 200 населеных пунктаў Віцебскай вобласці
На працягу папярэдніх сутак энергетыкі Віцебшчыны аператыўна ліквідавалі тэхналагічныя парушэнні, выкліканыя моцнымі дажджамі і парывістым ветрам. Было адноўлена электразабеспячэнне больш як 200 населеных пунктаў. "Часовыя адключэнні назіраліся ў некаторых населеных пунктах Шумілінскага, Віцебскага, Шаркаўшчынскага, Мёрскага, Лёзненскага, Полацкага, Аршанскага, Талачынскага і іншых раёнаў вобласці. Для паскарэння выканання работ былі прыцягнуты дадатковы персанал і тэхніка", - гаворыцца ў паведамленні.
Асноўная прычына аварыйных адключэнняў - падзенне дрэў і іх галін на правады ліній электраперадачы. Па стане на 9.00 3 жніўня працягваліся аварыйна-аднаўленчыя работы ў 10 населеных пунктах, размешчаных у Полацкім і Расонскім раёнах. РУП "Віцебскэнерга" прыняты ўсе неабходныя меры для ліквідацыі тэхналагічных парушэнняў і аднаўлення электразабеспячэння спажыўцоў у максімальна кароткія тэрміны.
У паведамленні адзначаецца, што ў выпадку адсутнасці электразабеспячэння неабходна звяртацца ў дыспетчарскую электрычных сетак раёна па тэлефоне 144.