Еўрапейскія эксперты адзначаюць высокае тэхналагічнае аснашчэнне Верхнядзвінскага масласырзавода

20 лістапада, Верхнядзвінскі раён /Дзіяна Курыло - БЕЛТА/. Еўрапейскія эксперты адзначаюць высокае тэхналагічнае аснашчэнне і прафесіяналізм персаналу на ААТ "Верхнядзвінскі масласырзавод", паведаміў сёння журналістам дырэктар публічнай арганізацыі LST Sert - органа па сертыфікацыі, акрэдытаванага пры Нацыянальным бюро Літоўскай Рэспублікі, упаўнаважаны ЕС Стасіс Брэнцюс. Гэтая аўдытарская кампанія ЕС праводзіла сертыфікацыю ААТ "Верхнядзвінскі масласырзавод" на адпаведнасць стандартам LST EN ISO 22000:2005 і LST EN ISO 9001:2008, перадае карэспандэнт БЕЛТА. Як адзначыў эксперт, атрымаць еўрапейскі сертыфікат якасці і бяспекі няпроста - даволі высокія патрабаванні. Аднак у выпадку з беларускім прадпрыемствам гэтая працэдура праходзіла лягчэй, бо прадпрыемства мае сучаснае абсталяванне, добра падрыхтаваны персанал і прайшло сертыфікацыю на адпаведнасць стандартам ISO 22000 і ISO 9001 беларускімі органамі па стандартызацыі. Як прызнаўся журналістам Стасіс Брэнцюс, ён спрабаваў беларускую прадукцыю, і яна яму спадабалася. Разам з тым якасць сваёй прадукцыі ААТ "Верхнядзвінскі масласырзавод" будзе пацвярджаць штогод - такія правілы сертыфікацыі ў ЕС, растлумачыў аўдытар. Верхнядзвінскі масласырзавод створаны ў 1964 годзе. Прадпрыемства акцыянавана ў 1999 годзе. Завод спецыялізуецца на вытворчасці цвёрдых сычужных сыроў. Удзельная вага жывёльных сыроў у агульным аб'ёме вытворчасці прадукцыі складае больш за 60%. За 10 месяцаў бягучага года выраблена прадукцыі на Br47,4 млрд., што на 16,3% больш у параўнанні з аналагічным перыядам мінулага года. Аб'ём вытворчасці спажывецкіх тавараў узрос на 32,4% і склаў Br38,1 млрд.-0-