Фестываль "Арт-парад у Віцебску" пройдзе ў анлайн-фармаце
Каб прыняць удзел у конкурсе, трэба зняць сваё выступленне ці працу на камеру і даслаць на электронную пошту ARTparad.vitebsk@gmail.com.
Творчае спаборніцтва пройдзе сярод калектываў і выканаўцаў ва ўзросце ад 6 гадоў па намінацыях "Вакал", "Харэаграфія", "Інструментальная музыка", "Выяўленчае мастацтва" і "Дэкаратыўна-прыкладное мастацтва і мастацкія рамёствы". Матэрыялы прымаюцца да 15 снежня.
Кампетэнтнае журы, у складзе якога педагогі, дзеячы культуры і мастацтваў, папулярныя выканаўцы, прадзюсары, менеджэры, прадстаўнікі СМІ і творчай інтэлігенцыі, адгледзіць заяўкі. Кожны ўдзельнік фестывалю-конкурсу атрымае персанальныя каментарыі ад членаў журы. Таксама ўдзельнікаў чакаюць майстар-класы, інтэрактыўны тур па Віцебску і трансляцыі ў сацсетках і на YouTube-канале Цэнтра культуры.
"Арт-парад" прысвечаны 30-годдзю міжнароднага фестывалю мастацтваў "Славянскі базар у Віцебску". Уладальнік галоўнага прыза атрымае запрашэнне на адно з афіцыйных мерапрыемстваў творчага форуму.