Фестываль моладзі прымежання пройдзе ў Віцебску
Геаграфія ўдзельнікаў форуму ахоплівае ўсю Віцебскую вобласць, а таксама дзясяткі рэгіёнаў Расійскай Федэрацыі. У горад на Дзвіне прыедуць прадстаўнікі Бранска, Томска, Омска, Яраслаўля, Энгельса, Валгаграда, Смаленска і Улан-Удэ (Бурація).
У межах фестывалю пройдуць конкурс медыяпраектаў «Калі скажуць слова Радзіма?», расійска-беларускі злёт маладых настаўнікаў, будуць працаваць дыскусійныя пляцоўкі «Міжрэгіянальнае супрацоўніцтва» і «Дабрачыннасць», дзе сваё слова скажуць эксперты з дзвюх краін – спецыялісты ў розных галінах сучасных ведаў і камунікацый, вучоныя, педагогі, прадстаўнікі органаў улады, мясцовага самакіравання і грамадскіх арганізацый. Для маладых людзей яны падрыхтавалі майстар-класы, спецыяльныя трэнінгі і практыкумы, круглыя сталы і г.д.
Да прыкладу, у ВДУ ім. П. Машэрава пройдзе адкрыты дыялог для маладых журналістаў «Малая радзіма ў аб'ектыве рэгіянальнага тэлебачання», дзе работнікі ТРК «Віцебск» раскажуць пра спецыфіку падрыхтоўкі сюжэтаў і праграм для мясцовага канала.
На базе Віцебскага абласнога палаца дзяцей і моладзі будучыя дыпламаты і парламентарыі сустрэнуцца са старшынёй абласнога Савета дэпутатаў Уладзімірам Церанцьевым, паўдзельнічаюць у рабоце трэнінгу прэзідэнта Цэнтра падтрымкі і развіцця грамадскіх ініцыятыў «Крэатыўная дыпламатыя» Наталлі Бурліновай, абмяркуюць перспектывы ўзаемадзеяння моладзі рэгіёнаў Расіі і Беларусі, рэалізацыю сумес ных праектаў.
Арганізатарамі фестывалю «З чаго пачынаецца Радзіма?» з'яўляюцца Віцебскі абласны Савет дэпутатаў, Прадстаўніцтва Расапрацоўніцтва ў Рэспубліцы Беларусь, Смаленская арганізацыя Расійскай саюза Моладзі і Віцебскі дзяржаўны ўніверсітэт ім. П. Машэрава.