Фізкультурна-аздараўленчы комплекс і лыжаролерную трасу па сусветных стандартах пабудуюць у Гарадку да «Дажынак-2014»
На падрыхтоўку Гарадку да рэспубліканскага фестывалю-кірмашу «Дажынкі-2014» ужо затрачана 50 млрд рублёў. Да восені яшчэ далёка, але работы ідуць поўным ходам, бо планы сапраўды грандыёзныя. Зрэшты, падрыхтоўка да фестывалю тычыцца ўсёй Віцебшчыны, ні адзін раён не павінен застацца ўбаку. Аб тым, якія трэба вырашыць задачы, ішла размова на чарговым пасяджэнні аблвыканкама.
Як паведаміў старшыня абласнога Савета дэпутатаў Аляксандр Ацясаў, 50 млрд руб. асвоілі ў 2013 годзе, на сённяшні дзень выдзелены яшчэ 435 млрд з абласнога бюджэту, 160 млрд – з рэспубліканскага, ёсць 200 млрд руб. уласных сродкаў прадпрыемстваў, а таксама спонсарская дапамога. Усяго неабходна каля 2 трлн руб. Праектна-каштарысная дакументацыя маецца на ўсе аб'екты, практычна па кожным вызначаны крыніцы фінансавання. Работы шмат, але ўсё рэальна выканаць, лічыць Аляксандр Ягоравіч.
Пачата рэканструкцыя Дома культуры, Дома рамёстваў і фальклору, у якога з'явіцца другі паверх, кінатэатра «Радзіма», дзе праектам прадугледжана захаваць яго візітную картку – пано віцебскага мастака, удзельніка вайны Анатоля Кавалёва. Трэба стварэнне фізкультурна-аздараўленчага комплексу з басейнам, а таксама лыжаролернай трасы, якая будзе пабудавана «з нуля» і абсталявана па сусветных стандартах. Адпаведна, зможа не толькі цешыць мясцовых аматараў актыўнага адпачынку і гасцей, але нават прымаць спаборніцтвы, трэніровачныя зборы біятланістаў. Усяго аб'ект з адміністрацыйным будынкам, паркоўкай, стрэльбішчам і іншымі збудаваннямі абыдзецца ў 127 млрд руб.
Галоўныя падзеі свята пройдуць на цэнтральнай плошчы. Да яе рэканструкцыі і добраўпарадкавання размешчанага ў прылеглым скверы мемарыяльнага комплексу «Няскончаная памяць» ўжо прыступілі, асвоена парадку 5 млрд руб. Побач з плошчай будзе створаны дзіцячы парк з атракцыёнамі.
Запланавана рэканструкцыя 13 аб'ектаў гандлю і грамадскага харчавання. Чакаюць змены і гарадскі рынак. На дадзены момант прапанаваны наступны варыянт: рынак перанясуць у адрамантаванае памяшканне, тым самым створаць годныя ўмовы для прадаўцоў і пакупнікоў. Аднак канчатковае рашэнне будзе прынята пасля абмеркавання з прадпрымальнікамі. Прадугледжаны мерапрыемствы па ўдасканаленні вытворчасці ААТ «Птушкафабрыка Гарадок», ІП «Дзітскасельскі-Гарадок» і іншых прадпрыемстваў.
Будуць добраўпарадкаваны пойма ракі Гарожанкі, 65 вуліц, двароў, праведзены капітальны рамонт 82 дамоў (тэрмарэнёвацыя пяці з іх ужо пачата). Плануецца таксама добраўпарадкаванне ліўневых каналізацый і ілюмінацыі, рэканструкцыя інжынерных сетак і ліній электраперадач, абнаўленне адміністрацыйных будынкаў РАНС, РУЭС, райгаза і іншых.
Трэба будзе прывесці ў парадак аўтастанцыю і, вядома ж, дарогі. На рамонт дарожнага палатна будзе накіравана дадаткова 30 млрд руб. ад выплаты транспартнага падатку. На тэрыторыі раёна трэба ўвесці ў абарот 10 тыс. га закінутых земляў, знесці аб'екты, якія не падлягаюць аднаўленню, пазабавіцца аб прыдарожных палосах і палях, лясных масівах і чысціні ля азёр. Акрамя таго, неабходна добраўпарадкаваць дарогі, па якіх удзельнікі фестывалю паедуць у сталіцу «Дажынак-2014», пазабавіцца аб тым, каб іх сустракалі дабраякасныя і камфортныя аб'екты прыдарожнага сэрвісу. Гэта тычыцца ў першую чаргу Аршанскага, Талачынскага, Шумілінскага, Бешанковіцкага раёнаў. Гасцей будуць таксама прымаць Віцебск і Віцебскі раён, так што і тут трэба накіраваць максімум намаганняў на падрыхтоўку аб'ектаў пражывання, харчавання, турызму.
– Гэта экзамен для ўсёй вобласці, мы павінны выглядаць годна. Неабходна, каб Віцебшчына падышла да свята з высокімі эканамічнымі паказчыкамі, трэба нямала папрацаваць, – падкрэсліў першы намеснік старшыні аблвыканкама Уладзімір Навацкі. – «Дажынкі» – гэта спосаб паглядзець на сябе збоку, зразумець, да чаго нам трэба імкнуцца. Усё гэта робіцца не дзеля аднаго дня, а для таго, каб Гарадок змог і далей дынамічна развівацца, зарабляць на паслугах, ствараць новыя вытворчасці, прыцягваць гасцей, каб у Віцебшчыны былі годныя «ўязныя вароты».
Вольга Маслоўская, "Віцебскія весці"