Фларысты Беларусі, Расіі і Арменіі прадставяць свае "анёльскія" работы ў Віцебску

Фларысты Беларусі, Расіі і Арменіі прадставяць свае "анёльскія" работы ў Віцебску, паведамілі карэспандэнту БЕЛТА ў Віцебскім мастацкім музеі.

Міжнародная выстава фларыстычнага калажа пад назвай "Анёл мой…" адкрываецца сёння ў Мастацкім музеі і будзе суправаджацца дабрачыннымі майстар-класамі. Яна арганізавана Міжнароднай творчай асацыяцыяй фітакалажыстаў "Фларысіма" як частка тэматычнага праекта, запушчанага ў красавіку 2014 года. Як тлумачаць арганізатары, у цыкле выстаў аўтары экспануюць работы, якія адлюстроўваюць іх разуменне і адчуванне свайго анёла. Таму работы прадстаўлены не толькі ў выглядзе выявы анёла, але і іншых вобразаў, блізкіх людзей, кветак, да якіх у аўтара "анёльскае" стаўленне.

Першая выстава праекта "Анёл мой…" адбылася ў красавіку 2014 года ў Маскве, у Цэнтральным доме журналіста. Затым рушылі ўслед выставы ў Расіі і Беларусі. У іх удзельнічалі майстры з гэтых краін, а таксама Арменіі - члены МТАФ "Фларысіма", кіраўнікі дзіцячых арганізацый дадатковай адукацыі і іх вучні.

Віцебск выбраны месцам правядзення выставы, якая завяршае гадавы праект "Анёл мой…", невыпадкова. Першую сваю выставу ў Беларусі ("Славянскія этюды" падчас фестывалю "Славянскі базар у Віцебску-2012") асацыяцыя "Фларысіма" правяла менавіта ў Мастацкім музеі.

МТАФ "Фларысіма" з'яўляецца міжнароднай арганізацыяй творчых людзей з Расіі, Беларусі і Арменіі. Мэтай яе дзейнасці з'яўляецца папулярызацыя фларыстычнага калажа, а таксама развіццё сяброўскіх адносін і ўзаемаразумення народаў краін Саюзнай дзяржавы і Еўразійскага эканамічнага саюза.

Кацярына Князева