ФОТАФАКТ: канцэрт у гонар Дня абаронцаў Айчыны і Узброеных Сіл Рэспублікі Беларусь прайшоў у Віцебску
Кіраўнікі вобласці і горада, вайскоўцы, ветэраны, прадстаўнікі працоўных калектываў, грамадскіх арганізацый, моладзь збіраліся на ўрачыстым мерапрыемстве, прысвечаным Дню абаронцаў Айчыны і 105-годдзю Узброеных Сіл Беларусі ў Канцэртнай зале «Віцебск».
Звяртаючыся да прысутных, ваенны камісар вобласці Руслан Шкодзін адзначыў:
– Сёння ў Рэспубліцы Беларусь адзначаюць Дзень абаронцаў Айчыны і 105-годдзе з дня ўтварэння Узброеных сіл Беларусі. Гэта па-сапраўднаму ўсенароднае свята, глыбока значнае для ўсіх беларускіх людзей. Яно нясе ў сваім змесце сімвалічнае яднанне мінулага і сучаснасці. У гэты дзень мы віншуем тых, хто адстаяў свабоду і незалежнасць нашай радзімы ў гады Вялікай Айчыннай вайны і выратаваў свет ад фашызму. Тых, хто сваёй ратнай працай умацоўваў баявую моц узброеных сіл. Хто з найвышэйшай доблесцю выконваў інтэрнацыянальны абавязак, схіляем галовы перад памяццю тых, хто аддаў жыццё за Радзіму. У гэты дзень мы ўшаноўваем тых, хто служыў і служыць ва ўзброеных сілах, нашых грамадзян, хто незалежна ад прафесіі і роду дзейнасці сваёй працай уносіць годны ўклад у забеспячэнне нацыянальнай бяспекі дзяржавы.
У сваім выступленні ваенкам вобласці падкрэсліў, што наша зямля перажыла шмат страшных і кровапралітных падзей, але гісторыя Беларусі багатая яркімі прыкладамі гераізму і адвагі, стойкасці і маральнага духу, любові да сваёй Айчыны. На яго думку, сучаснае пакаленне абаронцаў Радзімы з гонарам працягвае слаўныя традыцыі дзядоў і прадзедаў, надзейна забяспечваючы галоўныя каштоўнасці беларускага народа: мір, бяспеку і стабільнасць.
- За гады незалежнасці ў краіне створана сучасная, аснашчаная найноўшымі ўзорамі ўзбраенняў і тэхнікі армія, здольная эфектыўна вырашаць пастаўленыя задачы і даць годны адпор любому агрэсару, - канстатаваў Руслан Шкодзін. - Забеспячэнне ваеннай бяспекі дзяржавы сёння ажыццяўляецца ў прынцыпова новых геапалітычных, палітычных і эканамічных умовах. Распрацоўка і ўкараненне новых тэхналогій узброенага проціборства, гібрыдныя войны. Усё гэта жорсткая рэальнасць, пра якую мы раней не маглі нават падумаць. Таму дзяржава падтрымлівае і будзе падтрымліваць абаронны патэнцыял на самым высокім узроўні, здольным адбіць любую агрэсію. Штогод ва Узброеных Сілах праводзіцца падрыхтоўка і перападрыхтоўка тысяч ваеннаабавязаных, падрыхтоўка афіцэрскіх кадраў, кіраўнікоў органаў тэрытарыяльнай абароны, з улікам спецыфікі сучасных умоў.
У інтарэсах забеспячэння ваеннай бяспекі дзяржавы першачарговая ўвага надаецца развіццю ў грамадстве патрыятызму, выхаванню ў грамадзян пачуцця адказнасці за абарону Айчыны. Для гэтага ў нас ёсць добры прыклад, прыклад воінскай доблесці, вернасці свайму воінскаму абавязку, самаадданай пераданасці сваёй Айчыне і пакаленню Вялікай Перамогі. У гэтай зале прысутнічаюць ветэраны. Ваш вопыт, мужнасць, грамадзянскасць і патрыятызм з'яўляюцца вернымі арыенцірамі для сучасных і будучых пакаленняў абаронцаў Радзімы. Нізкі паклон і найвялікшая ўдзячнасць за подзвіг і мужнасць, праяўленыя ў гады суровых выпрабаванняў, годную службу ў мірныя будні. Няхай ваша доблесць і адвага будуць маяком для будучых салдат і афіцэраў, сапраўдных абаронцаў нашых маці, бацькоў, дзяцей, блізкіх людзей.
Ваенны камісар вобласці адрасаваў асаблівыя словы падзякі тым, хто сёння знаходзіцца ў баявым страі, хто абараняе беларускую зямлю, нацыянальныя інтарэсы краіны. Сучасная палітыка суседніх дзяржаў паказвае альтэрнатыву для нашай радзімы вельмі простую: альбо Беларусь будзе моцнай, альбо яе не будзе наогул, ва ўсякім разе ў тым выглядзе, у якім яна сёння існуе.
- Мы абавязаны захоўваць лепшыя традыцыі узброеных сіл, яны падтрымліваюцца сёння ў самой арміі, кадэцкіх і сувораўскіх вучэльнях, - сказаў Руслан Шкодзін. - Расце цікавасць і да ваеннай гісторыі, да нашых традыцый. Кожны юнак павінен адчуць сябе абаронцам, адчуваць адказнасць за сваіх блізкіх, і за Радзіму.
Самыя цёплыя словы сёння хочацца сказаць аб вашых сем'ях. Афіцэрскія сем'і - маральная апора самой арміі. Няма жанчын больш адданых і самаадданых, чым вашы маці і жонкі. Усе цяжкасці армейскага жыцця яны пераносяць на роўных з намі. Добрыя словы хочацца сказаць і на адрас ваеннаслужачых запасу і ў адстаўцы, ветэранскіх арганізацый і патрыятычных грамадскіх аб'яднанняў, сваёй дзейнасцю якія ўмацоўваюць маральны дух грамадства, аснову абароны краіны. У
Беларусі надзейна забяспечаны мір і стабільнасць. І наша задача захаваць гэты стан краіны для нашых нашчадкаў.
Афіцыйную частку працягнуў душэўны канцэрт у гонар Дня абаронцаў Айчыны. Нумары творчых калектываў Віцебска, пранікнёныя радкі песень ваенных гадоў, не пакінулі абыякавымі нікога ў зале. Пранікнёныя і кранальныя песні бралі за душу і прымушалі задумацца аб страшных падзеях ваенных гадоў. Кожнае выступленне завяршалася гучнымі апладысментамі.
