Футбалісткі нямецкага «Дуйсбурга-2001» прыбываюць у Віцебск для ўдзелу ў матчы Лігі чэмпіёнаў

28 верасня, Віцебск /Сяргей Кочатаў - БЕЛТА/. Футбалісткі нямецкага клуба "Дуйсбург-2001" прыбудуць сёння ў Віцебск для ўдзелу ў матчы 1/16 фіналу жаночай Лігі чэмпіёнаў УЕФА з віцебскай камандай "Універсітэт", паведамілі карэспандэнту БЕЛТА ў адміністрацыі беларускага клуба. Гульня пройдзе 30 верасня на полі Цэнтральнага спартыўнага комплексу абласнога цэнтра. Нямецкая каманда размесціцца ў гасцінічным комплексе "Лучоса" і, як чакаецца, апрабуе газон віцебскага ЦСК 29 верасня. Сёння пакуль складана гаварыць аб прысутнасці на матчы заўзятараў з Германіі, афіцыйных заявак на браніраванне месцаў для прыхільнікаў нямецкага клуба пакуль не паступала, паведамілі ў адміністрацыі. А віцебскія заўзятары рыхтуюцца аказаць гарачую падтрымку футбалісткам "Універсітэта", якая будзе вельмі неабходна ў гульні з наймацнейшым клубам Еўропы. Нямецкі клуб "Дуйсбург-2001" у мінулым сезоне стаў пераможцам апошняга ў гісторыі розыгрышу Кубка УЕФА, які цяпер зменіць Ліга чэмпіёнаў. Продаж білетаў у касах ЦСК пачаўся на мінулым тыдні, яны актыўна раскупляюцца, у тым ліку па заяўках прадпрыемстваў і арганізацый. "Вядома, мы не чакаем аншлагу на гэтым міжнародным матчы, але спадзяёмся, што актыўная падтрымка жыхароў горада дапаможа нашым футбалісткам годна правесці сустрэчу з аўтарытэтным сапернікам", - паведаміў карэспандэнту БЕЛТА намеснік дырэктара ЦСК Міхаіл Чарнамордаў. Футбольная арэна цалкам гатова да правядзення матчу, усе пытанні адпрацаваны, дадаў ён. Матч у адказ пройдзе 7 кастрычніка ў Дуйсбургу. Пераможца гэтай двухраундовай дуэлі ў 1/8 фіналу сустрэнецца з лепшай камандай пары "Цюрых" (Швейцарыя) - "Лінчэпінг" (Швецыя). -0-