Футбольнае поле і турнікі для варкаўта. У Езярышчы адкрылі шматфункцыянальную спартыўную пляцоўку
Спартыўны стадыён у гарпасёлку Езярышча Гарадоцкага раёна для дзяцей планавалі адкрыць да новага навучальнага года, але зацяжныя дажджы не дазволілі ажыццявіць задуманае — тэхніка ўгразла ў гразі. Таму адкрыццё аб'екта перанеслі. У урачыстай цырымоніі ўдзельнічалі прадстаўнікі мясцовай улады, грамадскіх арганізацый і школьнікі.
— Комплексная шматфункцыянальная гульнявая пляцоўка з штучным пакрыццём унікальная для нашых малых населеных пунктаў. Падобныя аб'екты ёсць толькі ў райцэнтры. Тут не толькі поле для гульні ў футбол, але і абсталяванне для заняткаў варкаўтам, бегавыя дарожкі з прагумаванай крошкі, — сказаў старшыня райвыканкама Пётр Карабач.
— У адпаведнасці з даручэннем кіраўніка дзяржавы была распрацавана праграма добраўпарадкавання населеных пунктаў Віцебшчыны, разлічаная на пяць гадоў. У лік першых у мінулым годзе трапіла Езярышча. Маштабная рэканструкцыя закранула літаральна кожны куток гарадскога пасёлка. Работы па добраўпарадкаванні працягваюцца. У прыватнасці, неўзабаве будзе пабудаваны 12-кватэрны жылы дом, падведзены газ, — паведаміў старшыня абласнога Савета дэпутатаў Уладзімір Цярэнцьеў. — Спадзяюся, стадыён стане любімым месцам адпачынку для езярышчан. Створаны ўсе ўмовы, каб тут з'яўляліся новыя зоркі спорту, у тым ліку сусветнага.
Мясцовыя дзеці ўжо паспелі ацаніць шырокія магчымасці спортпляцоўкі. Некаторыя з іх сур'ёзна задумаліся аб прафесійнай кар'еры спартсмена.
— Раней бегавыя дарожкі былі выкладзены гумовымі квадратамі, што павышала верагоднасць атрымання траўм. Цяпер пакрыццё дазваляе трэніравацца без асцярог і дасягаць высокіх вынікаў, — запэўніла пяцікласніца Наталля.
Пераўтварэнні ацаніў ветэран педагагічнай працы, былы настаўнік фізічнай культуры Езярышчанскай школы Яўген Шчамялёў. Ён падкрэсліў, што ўкладзеныя сродкі абавязкова сябе акупяць, у бліжэйшы час тут напэўна з'явяцца новыя лідары зборнай Беларусі па розных відах спорту.