Гендырэктар МТЗ падарыў Шумілінскай раённай гімназіі сертыфікат на абсталяванне для трактара
Ганаровыя госці, сярод якіх быў генеральны дырэктар МТЗ Віталь Воўк, наведалі Шумілінскую раённую гімназію. Даўнія сябры ўстановы адукацыі прывезлі гімназістам падарункі напярэдадні Новага года. "Для нас гэта вельмі значная падзея. Віталь Воўк уручыў сертыфікат на набыццё навеснага абсталявання для трактара, які ў нас ёсць. Гэта таксама падарунак МТЗ", - распавяла Ларыса Маладзечкіна.
Гэта не адзіны навагодні падарунак завода Шумілінскай гімназіі. Госці ўручылі кожнаму гімназісту салодкія падарункі і сувенірную прадукцыю з лагатыпам МТЗ. Таксама для патрэб установы адукацыі падарылі сертыфікат на Br7 тыс. "Нам патрэбна касілка, глебафрэза і бульбакапалка. Купім нешта адно з гэтага, на што хопіць сродкаў", - дадала кіраўніца гімназіі.
Сяброўства заводчан і шумілінскіх школьнікаў зарадзілася 5 гадоў таму, калі Ларыса Маладзечкіна даслала кіраўніцтву прадпрыемства ліст з просьбай падарыць міні-трактар. "Мы былі згодныя на любую эксперыментальную мадэль. Нам хапіла б і маленькага трактара. Пры гімназіі ёсць свая падсобная гаспадарка, і апрацоўваць участак уручную было цяжка. Калі мы ўжо забыліся пра гэты ліст, з намі нечакана звязалася кіраўніцтва завода, каб удакладніць, якую мадэль нам падораць", - падзялілася дырэктар гімназіі.
Калектыў МТЗ ужо не раз запрашаў шумілінскіх гімназістаў на навагодні канцэрт, які традыцыйна праходзіць прама ў вытворчым цэху. "Уражанняў рабятам хапае на год наперад. Перад паездкай на МТЗ ладзіцца цэлы конкурс сярод лепшых вучняў гімназіі. Для хлопчыкаў і дзяўчынак наведванне такога незвычайнага свята - адзін са стымулаў выходзіць у лідары па вучобе і быць актыўным удзельнікам розных мерапрыемстваў у гімназіі", - адзначыла Ларыса Маладзечкіна. Сёлета з-за пандэміі займальная паездка адмянілася. Але візіт ганаровых гасцей стаў падарункам для вучняў і педагагічнага калектыву.