Фіналісты абласнога этапу «100 ідэй для Беларусі» прапанавалі генератар энергіі і трывожную кнопку для людзей з інваліднасцю
Год навукі падыходзіць да завяршэння. Вядома, носьбітамі навуковай думкі і сур'ёзных распрацовак у нашай краіне, перш за ўсё, з'яўляюцца паважаныя навукоўцы са стажам, у якіх у актыве доўгія гады даследаванняў і праверак навуковых тэорый.
Але не варта спісваць з рахункаў моладзь: яна – носьбіт новых ідэй, свежых поглядаў на звыклае, а яе галоўныя прылады пры гэтым – амбіцыйнасць, мабільнасць і валоданне сучаснымі тэхналогіямі. Доказам таму стала абласная выстава-прэзентацыя «100 ідэй для Беларусі». Тут традыцыйна – смелыя думкі і нестандартныя IT-праекты.
– Мне давялося прысутнічаць на 2-м з'ездзе вучоных Беларусі, і там шмат разоў згадваўся конкурс «100 ідэй для Беларусі», на якім прадстаўляюцца лепшыя ідэі сённяшняй моладзі, – сказаў першы сакратар абласнога камітэта БРСМ Віктар Глушын. – Варта адзначыць, што сацыяльныя праекты ёсць заўсёды, але з кожным годам становіцца ўсё больш тых, якія накіраваны на далейшую камерцыялізацыю, дзе рабяты імкнуцца зарабіць. Часта гэта IT-рашэнні, вэб-тэхналогіі, робататэхніка, новыя тэхналогіі ў прамысловасці.
Да прыкладу, на сёлетняй выставе студэнты ПДУ прадставілі тры праекты: сайт валанцёры.by, «Трывожная кнопка» (сістэма экстраннага апавяшчэння для людзей з абмежаванымі магчымасцямі) і «Рабатызаваная сістэма сартавання смецця». Аўтары апошняга – чацвёртакурснікі радыётэхнічнага факультэта Максім Гарэвы і Аляксандр Карла, і іх распрацоўцы няма аналагаў у Беларусі. Сістэма з дапамогай датчыкаў здольна распазнаваць тры віды цвёрдых бытавых адходаў: метал, пластык і шкло. А выкарыстоўваць яе можна на смеццеперапрацоўчых заводах, скарачаючы пры гэтым выдаткі і мінімізуючы чалавечы фактар. Адназначна, выдатная ідэя!
Студэнты ВДТУ прэзентавалі мабільнае дадатак, якое аснашчана штучным інтэлектам, навучэнцы Полацкага эканамічнага каледжа – аўтаматызаваную палівальную сістэму для пакаёвых раслін, СШ № 15 Віцебска – гібрыдны генератар энергіі з прывадам ад ветрака, Яновіцкай сярэдняй школы – фітааксэсуары, напоўненыя водарам мясцовых кветак і траў, якія станоўча ўплываюць на здароўе.
Цікавы праект маладога інжынера філіяла «Вучэбны цэнтр» РУП «Віцебскэнерга» Дзмітрыя Варахобкі – сайт для дыстанцыйнага навучання персаналу прадпрыемстваў і электроннага тэсціравання. Гэта адзіны ў нашай краіне рэсурс, які дазваляе павысіць кваліфікацыю работнікаў па розных напрамках без адрыву ад вытворчасці. І гэта толькі малая частка заяўленых ідэй, прызначаных вырашаць задачы ў розных сферах.
– Дадзены конкурс – унікальны механізм, які дазваляе маладым людзям заявіць аб сабе і вызначыць крокі па рэалізацыі праектаў. Гэта падтрымка і прасоўванне інавацыйных адкрыццяў, рэальны шанец паказаць сваю энергію і ініцыятыву, – адзначыў начальнік галоўнага ўпраўлення ідэалагічнай работы, культуры і па справах моладзі аблвыканкама Генадзь Ягораў. – Органы ўлады гатовыя разглядаць і абмяркоўваць канструктыўныя ініцыятывы моладзі, накіраваныя на сацыяльна-эканамічнае развіццё рэгіёна і краіны ў цэлым.
У Год навукі павялічылася колькасць намінацый да 20 у залежнасці ад тэматыкі заяўленага праекта. Акрамя таго, пры падвядзенні вынікаў упершыню ўлічваўся ўзрост удзельнікаў, якіх падзялілі на тры групы: навучэнцы, студэнты і працуючая моладзь. Яшчэ адно важнае новаўвядзенне – магчымасць прыняць удзел у конкурсе людзі з абмежаванымі магчымасцямі.
У намінацыі «Інклюзіўная прастора» свой праект «Там, дзе нараджаецца казка» (майстэрня па вытворчасці лялек) прадставіў ТЦСАН Чашніцкага раёна. Яго мэта – сацыялізацыя людзей з абмежаванымі магчымасцямі, навучанне іх рамеснай дзейнасці і далейшая працоўная занятасць. Дарэчы, нашы чытачы бачылі работы гэтай майстэрні, адтуль жа і аўтары «Паштальёна Печкіна», які стаў пераможцам творчага конкурсу да 100-годдзя абласной газеты.
Па выніках выставы аўтары лепшых ідэй атрымалі падарункі ад абласнога камітэта ГА «БРСМ» і партнёраў конкурсу, а таксама пуцёўкі на рэспубліканскі фінал праекта «100 ідэй для Беларусі».
Адна з фінальных задач праекта – іх рэалізацыя. У гэтым плане трэба актыўней прыцягваць інвестараў. Пакуль жа ў асноўным ідэі ўвасабляюцца сіламі саміх хлопцаў і дапамогі экспертнага савета абласнога этапу, у ліку якога практыкуючыя прадпрымальнікі. Сярод рэалізаваных праектаў мінулых гадоў – сэрвіс падарожжаў YourTravel, «Аўтаматызацыя сістэмы ўліку перамяшчэння электралічыльнікаў» (РУП «Віцебскэнерга»), «Экабус» (Віцебскі раён) і інш.