Гільзы і патроны з кардону выпускаюць ва Ушачах

Вiдавочна, да абароннай прамысловасці прадукцыя прыватнага прадпрыемства не мае ніякага дачынення. Завод намотачных гільз займаецца вытворчасцю туб – кардонных прэсаваных балванак розных памераў. На гільзы, патроны, шпулі, барабаны можна наматаць усё што заўгодна: ад факсавай або газетнай паперы, скотчу, поліэтылену і шпагату да шклавалакна, лінолеуму, дахавага матэрыялу і дывановых вырабаў, таму рынак збыту падобнай прадукцыі дастаткова шырокі – прадпрыемствы будаўнічай, упаковачнай, тэкстыльнай, хімічнай і іншых галін народнай гаспадаркі. Галоўная задача, якую шэсць гадоў таму паставілі перад сабой мінскія прадпрымальнікі, заснавальнікі ТАА «Твестуба», – наладзіць выпуск імпартазамяшчальнага прадукту. Для гэтых мэт адрамантавалі пад цэхі пустуючы будынак ва Ушачах, закупілі якаснае новае абсталяванне, набралі калектыў і прыступілі да працы – сталі прымаць заказы. Старт малога бізнесу аказаўся больш чым удалым.

Праз год пачалі будаўніцтва дадатковага вытворчага будынка і складскіх памяшканняў, таксама была запушчана другая лінія па выпуску кардонных намотачных гільз, крыху пазней набылі і абсталяванне для вырабу тубусаў пад алкаголь і сувенірную прадукцыю. Да снежня 2012-га асвоілі вытворчасць кардонна-намотачных барабанаў (бочак), а два гады таму запусцілі высокаскорасную лінію па выпуску DTY і POY шпуль і патронаў, якія выкарыстоўваюцца ў хімічнай галіне.

– Сучаснае абсталяванне з Кітая і Тайваня дазваляе перабудоўвацца пад запыты канкрэтнага заказчыка – вырабляць тубы рознага ўнутранага дыяметра, таўшчыні сценак і даўжыні. Кардонныя патроны могуць быць з верхнім пакрыццёвым пластом пергаменту любой з 15 даступных колераў, на ўнутраны бок вырабу можна нанесці лагатып. Кардонна-намотачныя барабаны, бочкі выкарыстоўваюцца для ўпакоўкі, транспарціроўкі і захоўвання парашкападобнай, сыпучай, цвёрдай і пастападобнай прадукцыі – ад павідла і згушчонага малака, медыцынскіх або хімічных парашкоў да бітуму, фарбы або электрычнага кабеля, – распавядае намеснік дырэктара па вытворчасці Мікалай Апёнак.

Прадукцыя «Твестубы» сёння запатрабавана як у віцебскім рэгіёне, так і па ўсёй Беларусі і нават за яе межамі. Да прыкладу, толькі «Полацк-Шкловалакно» закупляе 27 пазіцый з асартыментнага пераліку ўшацкага завода намотвальных гільзаў, у ліку іншых кліентаў – як гіганты мясцовай індустрыі «Палімір», «Нафтан», «Віцебскія дываны», так і невялікія прыватныя арганізацыі «Полацкая папяровая кампанія», «Галтэяфарм» і інш. Па ўсёй рэспубліцы ў «Твестубы» каля 60 партнёраў, сярод іх найбуйнейшыя прадпрыемствы хімічнай прамысловасці «Магілёўхімвалакно» і «Гроднахімвалакно». Запатрабавана прадукцыя і за межамі нашай краіны, перыядычна яе адгружаюць у розныя гарады Расійскай Федэрацыі, таксама на працягу двух з паловай гадоў ушацкі вытворца цесна супрацоўнічае з Прыбалтыкай: у асноўным пастаўкі кардонна-намотвальных туб ідуць у Літву, хоць там у беларускага прадпрыемства дастаткова канкурэнтаў. Аптымальнае суадносіны цаны, якасці, тэрмінаў дастаўкі і ўмоў аплаты дазваляюць «Твестубе» атрымліваць перавагу.

– За 9 месяцаў 2015 года ў Літву было пастаўлена прадукцыі на 560 млн рублёў. Усяго за гэты перыяд аб'ём вытворчасці склаў больш за 514 тысяч штук, або 3 057 млн рублёў, для параўнання, у мінулым годзе гэтыя паказчыкі былі – 267 тысяч штук, або 2 636 млн рублёў. Працуем мы толькі пад заказ, пад адгрузку, – распавядае галоўны бухгалтаp ООО «Твестуба» Аксана Шаўчэнка.

Прырост эканамічных паказчыкаў – вынік не толькі пашырэння вытворчых плошчаў і наменклатуры выпускаемых вырабаў, але і ўмення падбудоўвацца пад запыты сваіх кліентаў і сучасныя ўмовы рынку. Прыклад «Твестубы» паказвае, што і ў глыбінцы можна наладзіць рэнтабельную вытворчасць імпартазамяшчальнай прадукцыі.

Наталля Камлёва. Фота Антона Сцепанішчава. «Віцебскія весці».