Старшыня Адміністрацыі Прэзідэнта Наталля Качанава правяла прыём грамадзян у Копысі

Адказ на гэтыя пытанні атрымала кіраўнік Адміністрацыі Прэзідэнта Беларусі Наталля Качанава падчас выязнога прыёму грамадзян у пасёлку Копысь. 

Кіраўнік Адміністрацыі расказала пра сацыяльна-эканамічнае становішча па краіне ў цэлым, пра тое, якія задачы ставіць Прэзідэнт перад урадам і ўладай на месцах, пра планы па развіцці малых рэгіёнаў. Яна падкрэсліла, што для таго, каб надаць ім новы імпульс, шмат што робіцца і яшчэ будзе зроблена.

– Неабходна, каб не скарачаліся, а працавалі і развіваліся прадпрыемствы, – адзначыла Наталля Качанава. – Тады ў людзей будзе занятасць і заработная плата, а адпаведна, упэўненасць у заўтрашнім дні. Мы імкнёмся зрабіць так, каб людзям жылося камфортна і яны маглі працаваць, вырошчваць дзяцей у нармальных умовах.

Выступіла перад прысутнымі і дырэктар прадпрыемства «Інстытут Віцебскграмадзянпраект» Наталля Косабука. Яна нагадала, што ў студзені прайшло грамадскае абмеркаванне генплана – праграмы развіцця гарадскога пасёлка на 30 гадоў (3-га этапу).

Першачарговая ўвага – горадаўтваральным прадпрыемствам. Гэта цэх сырзавода з пляцоўкай для яго развіцця і камбінат будаўнічых матэрыялаў, дзе актыўна ідзе рэалізацыя намечаных планаў. Таксама генпланам прадугледжана стварэнне ў Копысі пляцовак для развіцця малога і сярэдняга бізнесу, што надзвычай важна для такіх населеных пунктаў.

Падчас жывога дыялогу з кіраўніком Адміністрацыі быў узняты пытанне недаверу вяскоўцаў да мясцовай улады. Тэму дэбюракратызацыі апарата Аршанскага райвыканкама закрануў пенсіянер, карэнны жыхар пасёлка Віктар Нездзераў. Ён паскардзіўся на «кабінетны» стыль працы многіх чыноўнікаў, якія аддаюць перавагу прымаць рашэнні без аб'ектыўнага аналізу рэальнага становішча на месцах, пры гэтым ствараючы бачнасць актыўнасці.

У якасці прыкладу ён прывёў зварот у райвыканкам з нагоды ўстаноўкі ў Копысі банкамата, які павінен быць даступны людзям 24 гадзіны на суткі, а не размяшчацца ўнутры будынка банка з адпаведным рэжымам працы. Выказаліся людзі і з нагоды неабходнасці будаўніцтва жылля для педагогаў і медыкаў, уладкавання спартыўных пляцовак для дзяцей, нездавальняючай устаноўкі агароджаў уздоўж вуліц, нізкіх закупачных цэнах на сельгаспрадукцыю.

Абмеркавалі і бедны асартымент мясцовай крамы №26 «Прадукты». У прыватнасці, звярнулі ўвагу Наталлі Качанавай на нізкую заработную плату прадаўца (135 рублёў), якая штодня ездзіць на працу з Оршы і пры гэтым прэтэнзій да яе не ўзнікае – толькі падзякі.

З усімі пытаннямі Наталля Іванаўна паабяцала разабрацца ў бліжэйшы час. Яна наведала шэраг аб'ектаў сацыяльнай сферы пасёлка, каб ацаніць маштабы праведзеных работ і існуючыя праблемы.

– Сёння я ўбачыла, што людзі пазітыўна ставяцца да таго, што робіць для іх дзяржава, – паведаміла падчас размовы з журналістамі Наталля Качанава. – Яна дадала, што ў які б рэгіён ні прыязджала, усюды ёсць свае асаблівасці. Але асноўныя тры пытанні, на якія ўрад звяртае самае пільную ўвагу, – гэта занятасць, заработная плата і цэны.

– Тое, што я пачула нараканні на працу мясцовых органаў улады – гэта дрэнна, – адзначыла кіраўнік Адміністрацыі. – Такога стаўлення да людзей быць не павінна. З народам трэба як мага часцей сустракацца, размаўляць. І ставіцца так, як да сваіх блізкіх. Ад нас гэтага патрабуе і Прэзідэнт – сумленнага і справядлівага стаўлення да людзей. Калі людзі звяртаюцца ў вышэйшыя арганізацыі – значыць, нездавальняюча працуе ўлада на месцах, кульгае тлумачальная праца, у прыватнасці, праз СМІ. А бо ўсё проста: патлумач адкрыта, сумленна, даступна, і людзі павераць.

Наталля Іванаўна расказала, што ў мінулым годзе ў Адміністрацыю паступіла 24 тыс. зваротаў. Сёлета назіраецца тэндэнцыя да павелічэння.

– Людзі пішуць у надзеі, што Прэзідэнт іх пачуе. Таму наша задача – не адпісваць на міністэрствы і ведамствы, а самім разбірацца, на месцах. З гэтай мэтай праводзім выязныя прыёмы і глядзім, як працуюць рэгіянальныя органы ўлады, -- падкрэсліла кіраўнік Адміністрацыі.

Наталля Качанава выказала надзею, што новы старшыня райвыканкама навядзе належны парадак у раёне.

Вольга ЛЕБЕДЗЕВА, фота аўтара. "Віцебскія весці".