Старшыня НАК наведаў спаборніцтвы па тайскім боксе ў Віцебску і сустрэўся са спартсменамі пасля баёў
На рынгу змагаліся восем пар спартсменаў. У паўфінальным паядынку беларус Міхаіл Якімовіч абышоў спартсмена з Узбекістана і заваяваў пуцёўку ў фінал.
Беларускія спартсмены, якія ўжо не ўпершыню ўдзельнічаюць у спаборніцтвах міжнароднага ўзроўню, паспелі ацаніць незвычайнасць адкрытай пляцоўкі. Сямён Ступакевіч, які выступаў учора, адзначыў, што рынг дае дадатковы зарад энергіі. "Выдатны рынг, адчуваеш нейкую эйфарыю падчас бою. Гледач у Віцебску таксама надзвычайны, дзякуй за падтрымку", - распавёў спартсмен.
Паўфінальныя баі ў муай-тай будуць праходзіць у Віцебску 11-12 жніўня, а ў нядзелю з 11.00 стартуюць фінальныя баі. Гледачоў запрашаюць у Летні амфітэатр паказаць такую ж гасціннасць і азарт заўзятараў, якія яны праяўляюць і на папярэдніх баях.
Прэзідэнт Нацыянальнага алімпійскага камітэта Беларусі Віктар Лукашэнка сустрэўся са спартсменамі ў Віцебску пасля спаборніцтваў па тайскім боксе.
Кіраўнік НАК пагутарыў са спартсменамі, трэнерамі, пацікавіўся, як іх сустрэлі і размясцілі. "Адчуваецца клопат на кожным кроку – ад сустрэчы з цягніка да размяшчэння ў інтэрнаце і спаборніцтваў", - адзначылі прадстаўнікі расійскай каманды.
Спартсмены ў захапленні ад віцебскай публікі, якая скандуе: "Расія!" пасля выхаду кожнага ўдзельніка спаборніцтваў, і прадстаўнікі брацкай краіны прызналіся, што яны засумавалі па гэтым. "Падтрымліваюць усе краіны, любяць спорт, і гэта самае галоўнае, што ёсць спартыўны інтарэс, азарт, і я спадзяюся, што відовішчы не саступаюць па эмоцыях", - асабліва падкрэслілі расійскія атлеты.
"БЕЛТА"
"Раней тут, у Віцебску, праходзілі толькі канцэрты ў Летнім амфітэатры, а цяпер прайшло спартыўнае мерапрыемства. Глядзіцца, пагадзіцеся, нядрэнна, і думаю, на фіналах будзе цікава. Тых, хто прайшоў далей, віншую, а хто не прайшоў, не засмучайцеся, у вас яшчэ ўсё наперадзе, на тое гэта і спорт", - адзначыў прэзідэнт НАК.
Памочнік Прэзідэнта - інспектар па Віцебскай вобласці Ігар Брыло, старшыня Віцебскага аблвыканкама Аляксандр Субоцін і прэзідэнт НАК Беларусі Віктар Лукашэнка
Віктар Лукашэнка таксама спытаў у спартсменаў, якія краіны, на іх думку, у муай-тай самыя моцныя. Расіяне выказалі сваё меркаванне, што гэта чатыры асноўных сусветных гульца - Беларусь, Расія, Украіна і Тайланд. Нашы блізкія сябры выказалі пажаданне сустракацца ў падобным фармаце часцей. Старшыня Віцебскага аблвыканкама Аляксандр Субоцін паабяцаў, што ўнікальная для такіх спаборніцтваў спартыўная пляцоўка будзе рада вітаць міжнародныя спаборніцтвы зноў і зноў, няхай гэта будзе бокс, муай-тай, ММА ці любыя іншыя віды спорту. "Лавіце губернатара на слове, калі ён паабяцаў, то зробіць", - адзначыў кіраўнік НАК.
Трэнеры і байцы выказалі вялікую падзяку і арганізатарам Гульняў, і гледачам, якія кожны дзень з нязменнай цікавасцю прыходзяць у Летні амфітэатр і дораць спартсменам шмат эмоцый.