Старшыня аблвыканкама павіншаваў выхаванцаў Віцебскага дзіцячага дома ў рамках дабрачыннай акцыі «Нашы дзеці»
— Гэта адно з самых важных мерапрыемстваў у годзе, неабходна віншаваць дзяцей, якія апынуліся ў няпростай жыццёвай сітуацыі, каб яны верылі ў нешта светлае, узнёслае, — адзначыў Аляксандр Міхайлавіч. — Жадаю дзецям у новым годзе выканання ўсіх жаданняў.
– На сённяшні дзень у Дзіцячым доме Віцебска знаходзіцца 70 дзяцей, – паведаміла дырэктар установы адукацыі Наталля Кульценко. – Вядома, яны мараць знайсці сям'ю. Сёлета 60 нашых падапечных яе знайшлі: 10 дзяцей – усынавілі, 18 – вярнуліся ў свае сем'і (дарэчы, адной аднавілі бацькоўскія правы), апека была ўстаноўлена над 21 дзіцем, 9 – накіраваліся ў дзіцячыя дамы сямейнага тыпу. Дадзены паказчык работы з'яўляецца лепшым у рэспубліцы і стабільным на працягу апошніх 5-6 гадоў. Усё гэта дзякуючы праграме па дэінстытуцыяналізацыі дзяцей-сірот – уладкаванню іх у замяшчальныя сем'і, якую ў свой час пачаў Прэзідэнт Беларусі Аляксандр Лукашэнка.
Для ўсіх гасцей мерапрыемства выхаванцы і педагогі ўстановы адукацыі падрыхтавалі чароўную казку, дзе дабро перамагае зло, пануе мір, узаемаразуменне і любоў. Не абышлося без запальных карагодаў, песень і шматлікіх падарункаў. Аляксандр Субоцін уручыў дакументы на новыя тэлевізары, акустычную сістэму і пыласос, старшыня Віцебскага гарадскога Савета дэпутатаў Уладзімір Белевіч – сертыфікат на набыццё мэблі, кіраўнік адміністрацыі Кастрычніцкага раёна Віцебска Юрый Панфілаў – дакументы на новы халадзільнік.
Дзеці падарылі кіраўніку вобласці выраб, зроблены сваімі рукамі, — тыграня. Сімвал года таксама атрымалі ўсе госці.
