Старшыня аблсавета Уладзімірцеранцьеў павіншаваў з надыходзячым Новым годам выхаванцаў дзіцячых дамоў сямейнага тыпу ў Гарадку
Уладзімір Уладзіміравіч разам з прадстаўнікамі райвыканкама наведаў сем'і Сапрыкавых і Дваровых. Госці выказалі падзяку бацькам-выхавальнікам за цеплыню, якую яны даюць дзецям, што засталіся без апекі родных. Гаспадары падрыхтавалі для наведвальнікаў музычныя нумары і сувеніры, зробленыя сваімі рукамі.
Юлія і Уладзімір Сапрыкавы выхоўваюць шасцярых дзяцей, Ганна і Яўген Дваровыя — 12. Для іх вялікая радасць бачыць шчаслівыя вочы і ўсмешкі на тварах хлапчукоў і дзяўчынак. Спецыяльная адукацыя і вопыт дазваляюць дарослым вырошчваць добрых, чулых і жыццярадасных дзяцей, знаходзіць падыход да кожнага, прывіваць любоў да вучобы і творчасці. Да прыкладу, яны ўдзельнічаюць у здымках гумарыстычных ролікаў, якія выкладваюцца ў інтэрнэт, у конкурсах розных узроўняў і спартыўных спаборніцтвах, разам гатуюць і падарожнічаюць.
Дружныя, маладыя і крэатыўныя сем'і Сапрыкавых і Дваровых — сапраўдны гонар раёна, адзначыў Уладзімір Цярэнцьеў. Радуе, што на шляху рабят з дзіцячых дамоў сустракаюцца людзі, якія дораць ім любоў, саграваюць цёплым словам, прысвячаюць ім сваё жыццё.
Напрыканцы сустрэчы Уладзімір Уладзіміравіч уручыў сертыфікаты на набыццё бытавой тэхнікі і падарункі рабятам.