Старшыня аблсавета Уладзімірцеранцьеў высока ацаніў новыя сацыяльныя аб'екты Наваполацка
У ходзе рабочай паездкі Уладзімір Цярэнцьеў у суправаджэнні старшыні Наваполацкага гарвыканкама Дзмітрыя Дзямідава і старшыні гарсавета дэпутатаў Вячаслава Дурнова пабываў у новым вучэбна-лабараторным корпусе Полацкага дзяржаўнага ўніверсітэта ў пасёлку Междуречье, дзе размясціліся юрыдычны і спартыўна-педагагічны факультэты.
У кароткія тэрміны, як расказаў рэктар ПДУ Дзмітрый Лазоўскі, на плошчах, перададзеных ВНУ ААТ «Нафтан», уласнымі сіламі за кошт сродкаў пазабюджэтнага фінансавання быў зроблены рамонт і створаны самыя сучасныя ўмовы для паспяховай падрыхтоўкі студэнтаў.
У прыватнасці, унікальная зала судовых пасяджэнняў аснашчана відэаканферэнцсувяззю, што дазваляе працаваць дыстанцыйна, абсталяваны спецыяльныя кабінеты крыміналістыкі, анатоміі і фізіялогіі, асобныя памяшканні для канферэнцый і перамоваў, трэцейскага суда, студэнцкай службы прававой дапамогі. Акрамя таго, для студэнтаў, выкладчыкаў, а таксама жыхароў рэгіёну працуе wellness-цэнтр. Ёсць некалькі трэнажорных і спартыўных залаў, зоны для заняткаў настольным тэнісам, сауна, адкрытыя пляцоўкі для вялікага тэніса і міні-футбола.
Для зручнасці і эстэтызацыі адукацыйнай прасторы кожны з чатырох карпусоў навучальнай зоны аформлены ў пэўнай каляровай гаме – чырвонай, лімоннай, зялёнай і аранжавай. Утульная атмасфера створана ў светла-бэзавым абедзенным зале сталоўцы La Gusto, дзе можна не толькі смачна паесці, але і прыемна адпачыць. Дзякуючы пераезду факультэтаў ВНУ ажыў і сам пасёлак Междуречье, палепшылася транспартнае абслугоўванне яго жыхароў.
Азнаёміўшыся з аб'ектам, Уладзімір Цярэнцьеў назваў яго адным з лепшых у рэспубліцы.
– Я меркаваў, што ўбачу нешта грунтоўнае і сучаснае, але нават не ўяўляў, што комплекс можа быць
такім узрушальным. Сённяшнім студэнтам можна толькі пазайздросціць, – сказаў Уладзімір Уладзіміравіч.Створаную матэрыяльна-тэхнічную базу ён параіў шырэй выкарыстоўваць для рэкламы адукацыйных паслуг ПДУ, у тым ліку запрашаючы замежных студэнтаў, якіх сёння ў ВНУ вучыцца 250.
Кіраўнік аблсавета дэпутатаў наведаў таксама нядаўна ўведзеную ў строй пачатковую школу ў новым мікрараёне. Ён агледзеў выдатна аснашчаныя кабінеты, пагутарыў з педагогамі і дзецьмі. У сталоўцы і буфеце быў прыемна здзіўлены разнастайнасцю прапанаваных страў. У бібліятэцы паабяцаў дапамогу ў паляпшэнні камплектавання кніжнага фонду. А ў цэлым прыйшоў да высновы, што рашэнне аб будаўніцтве унікальнага комплекснага вучэбна-педагагічнага аб'екта, у склад якога ўваходзяць таксама яслі-сад і міжшкольны блок з басейнам, спартыўным і актавым заламі, было правільным: вучыцца тут дзецям цікава і камфортна.
Убачыць наступны сацыяльны аб'ект Уладзіміру Церанцьеву было важна і як старшыні абласной федэрацыі плавання. Палац водных відаў спорту «Садко» раней належаў ААТ «Нафтан», а год таму быў перададзены гораду. Тут правялі рэканструкцыю чары плавальнага басейна, дарэчы, самага вялікага на Віцебшчыне: ён мае восем дарожак даўжынёй 50 метраў і дазваляе прымаць міжнародныя спаборніцтвы. Да паслуг насельніцтва таксама чатыры спартыўныя залы і аднаўленчы цэнтр з саўнай. Матэрыяльна-тэхнічная база палепшылася, і цяпер спартыўны комплекс трэба выкарыстоўваць з максімальнай эфектыўнасцю.
Уладзімір Церанцьеў адзначыў, што сацыяльная сфера Наваполацка працягвае паспяхова развівацца, нягледзячы на складаныя эканамічныя ўмовы. Гэта пацвердзіў і намеснік старшыні гарвыканкама Алег Буевіч.
У прыватнасці, у інвестыцыйную праграму на 2017 год унесена распрацоўка праектна-каштарыснай дакументацыі яшчэ аднаго дзіцячага садка ў новым мікрараёне, вядуцца работы ў парку культуры і адпачынку, вялікія зрухі ў плане аснашчэння новым абсталяваннем намячаюцца ў сферы аховы здароўя.
Ларыса Малашэня. Фота Таццяны Русаковіч. «Віцебскія весці».