Старшыня Віцебскай вобласці Аляксандр Субоцін узяў удзел у пасадцы кедравага гаю
Навучэнцы Полацкага ляснога каледжа, якія прыйшлі на гэтае мерапрыемства са сваімі выкладчыкамі, расказалі гасцям пра сваё разуменне значнасці Вялікай Перамогі: кожнае дрэва тут стане сімвалам памяці і падзякі мірнага пакалення ваеннаму пакаленню. Самы непасрэдны ўдзел у пасадцы пухнатых маладых кедраў разам з маладым пакаленнем палачан прыняў не толькі кіраўнік вобласці, але і старшыня Полацкага райвыканкама Ігар Марковіч, ветэраны вайны Альберт Збароўскі, Аляксандр Растапчын, старшыня раённай ветэранскай арганізацыі Галіна Муравей.
– Стварэнне кедравага гаю стане жывым сімвалам памяці і пакланення перад гераізмам абаронцаў Айчыны, напамінам усім нам пра подзвіг нашых дзядоў і прадзедаў, – сказаў Аляксандр Субоцін. – Якім бы напружаным ні быў графік нашых дзён, у такую пагоду 5–6 дрэваў кожны з нас можа пасадзіць. Паглядзіце: усе ўсміхаюцца, сонца свеціць, і мы робім шляхетную справу, саджаем дрэвы, якія застануцца нашым дзецям і ўнукам.
На пытанне карэспандэнта "ВВ" Аляксандр Субоцін адказаў, што і яго сям'і ў свой час дакранулася вайна: абодва дзяды ваявалі на франтах Вялікай Айчыннай, адзін быў танкістам, другі на франтавым грузавіку даехаў да Берліна.
– Напэўна, няма ніводнай сям'і ў Беларусі, у летапісе гісторыі якой не было б трагічных старонак і ран, нанесеных той страшнай вайной, – сказаў Аляксандр Субоцін. – Таму памяць пра яе – гэта цэментуючая сіла, якая нас аб'ядноўвае і робіць нас мацнейшымі.