Глыбоцкі мясакамбінат накіраваў каля Br15 млрд. на мадэрнізацыю цэха першаснай перапрацоўкі жывёлы

18 лістапада, Віцебск /Вольга Багачова - БЕЛТА/. Глыбоцкі мясакамбінат накіраваў у бягучым годзе каля Br15 млрд. на мадэрнізацыю цэха першаснай перапрацоўкі жывёлы. Аб гэтым карэспандэнту БЕЛТА паведаміў галоўны інжынер прадпрыемства Аляксандр Калантай на выстаўцы-кірмашы "Віцебшчына - за здаровы лад жыцця!", якая сёння прайшла ў абласным цэнтры. Для тэхнічнага пераўзбраення цэха камбінат набыў лініі па забоі буйной рагатай жывёлы магутнасцю 60 галоў у гадзіну і свіней (магутнасць 110 галоў у гадзіну), апрацоўцы слізістых і шарсцяных субпрадуктаў і перапрацоўцы свіных і ялавічных камплектаў кішак. Увесці ў строй гэта абсталяванне замест раней дзеючага плануецца ў снежні. Рэалізацыя інвестпраекта накіравана на павышэнне якасці мясных вырабаў, адпаведнасць патрабаванням Расійскай тэхнічнага рэгламенту і павелічэнне аб'ёмаў вытворчасці, адзначыў Аляксандр Калантай. Акрамя таго, у снежні прадпрыемства закупіць лінію па ўпакоўцы сырых паўфабрыкатаў магутнасцю 1 т-1,2 т у гадзіну, якую плануецца запусціць у студзені 2011 года. Гэта дазволіць камбінату пачаць пастаўку ў Расію паўфабрыката, скараціўшы адгрузку мяса на костках. Кошт нямецкага абсталявання - Br320 млн. Інвестыцыі, накіраваныя ў асноўны капітал Глыбоцкага мясакамбіната, у гэтым годзе складуць Br15,8 млрд. Значны аб'ём сродкаў трэба будзе асвоіць і ў 2011 годзе. Так, прадпрыемства плануе рэалізаваць інвестпраект па будаўніцтве лакальных ачышчальных збудаванняў па еўрапейскіх тэхналогіях коштам Br7,5 млрд. і выканаць асноўны аб'ём работ па рэканструкцыі мясаперапрацоўчага корпуса. Кошт гэтага інвестпраекта ацэньваецца ў Br17,5 млрд. Запуск аб'екта намечаны на 2012 год. За студзень-кастрычнік прадпрыемства выпусціла прадукцыі на Br123,9 млрд., або 120,2% да аналагічнага ўзроўню мінулага года. Рэнтабельнасць рэалізацыі за дзевяць месяцаў - 8,8%. На экспарт за дзесяць месяцаў пастаўлена прадукцыі на $21,5 млн., што больш чым у два разы больш у параўнанні з аналагічным перыядам мінулага года. Асноўная частка паставак ажыццяўлялася ў Расію. Скураная сыравіна грузіцца ў краіны СНД і Еўропы. Глыбоцкі мясакамбінат заснаваны ў 1936 годзе. Акцыянаваны ў 1997-м. У склад прадпрыемства таксама ўваходзіць сельскагаспадарчы філіял "Галубічы", у якім у цяперашні час вядзецца будаўніцтва малочна-таварнай фермы коштам Br16,5 млрд. на 600 галоў буйной рагатай жывёлы. Прадпрыемства спецыялізуецца на вытворчасці каўбасных, сыравэнджаных вырабаў, мяса. Асартымент прадукцыі налічвае каля 250 найменняў. Агульная колькасць работнікаў - больш за 620 чалавек.-0-