Гарадок стаў другім райцэнтрам Віцебскай вобласці, дзе выкладаюць кітайскую мову

Курсы кітайскай мовы адкрыліся ў Гарадку Віцебскай вобласці, паведаміла Галіна Сімурова, дырэктар Гарадоцкага цэнтра дзяцей і моладзі, на базе якога і прапанавана новая паслуга.

Гарадок стаў другім пасля Оршы райцэнтрам рэгіёна, дзе можна вывучаць мову Паднябеснай. Прычым не толькі школьнікам. Першая набраная група пачне заняткі 17 кастрычніка. Вывучаць кітайскую мову выявілі жаданне 15 чалавек - вучні выпускных класаў і працуючая моладзь.

Многія маюць намер выкарыстоўваць атрыманыя веды ў прафесійнай дзейнасці, а будучыя абітурыенты хочуць у наступным працягнуць навучанне мове на базе ўніверсітэта.

"Курсы замежнай мовы - для нас новая паслуга. Ужо доўгія гады пры цэнтры працуе школа ранняга развіцця "Радасць", якая арыентавана ў асноўным на дзяцей 4-6 гадоў. Малышы займаюцца харэаграфіяй, спевамі, музыкай, выяўленчым мастацтвам. А з гэтага года мы вырашылі набраць групу крыху старэйшы (5-6 гадоў) па вывучэнні англійскай мовы. І наш педагог дадатковай адукацыі Святлана Межэвіч, асоба вельмі разнабаковая, дарэчы, хутка вернецца са стажыроўкі з ААЭ, дзе атрымлівае навыкі арабскай, прапанавала выкладаць яшчэ і кітайскую - для дарослых. Ахвотных аказалася дастаткова. Магчыма, і другую групу набярэм", - дадала Галіна Сімурова. Актывізацыя адносін паміж нашай краінай і Кітаем у самых розных сферах жыцця спрыяе таму, што цікавасць да кітайскай мовы з кожным годам расце.

У Віцебскім рэгіёне найбольш шчыльна ў гэтым напрамку працуе СШ №44 абласнога цэнтра, дзе кітайскую мову выкладаюць з 2003 года, а ў 2014-м адкрылі кабінет Канфуцыя. Аналагічны кабінет ёсць і ў Віцебскім дзяржуніверсітэце ім. П. Машэрава, дзе таксама арганізаваны моўныя курсы.

Кацярына Князева, БЕЛТА.