Гарадскія пляжы Віцебска прывядуць у парадак да 1 чэрвеня

Сёння адным з актуальных пытанняў, якому ў краіне ўдзяляецца пільная ўвага, з'яўляецца навядзенне парадку на зямлі, прывядзенне ў належны стан вытворчых тэрыторый, сельскагаспадарчых аб'ектаў, населеных пунктаў, прыдарожных палос, лясоў, месцаў размяшчэння адходаў, зон адпачынку.

Карэспандэнт «ВВ» разам з начальнікам Віцебскай гарадской інспекцыі прыродных рэсурсаў і аховы навакольнага асяроддзя Валерыем Фандо адправілася ў рэйд па зонах масавага адпачынку на водных аб'ектах і садаводчых таварыствах у абласным цэнтры і яго наваколлі. Гэтыя месцы яшчэ напачатку красавіка былі абследаваны інспекцыяй сумесна з Віцебскім гарвыканкамам, рашэннем якога 13 красавіка 2015 года зацверджаны план мерапрыемстваў па падрыхтоўцы да сезона зон масавага адпачынку на водных аб'ектах горада. За гэты час некаторыя аб'екты ўжо прыведзены ў парадак, а на іншых праца ў самым разгары.

У Віцебску сем месцаў адпачынку, дзе ёсць пляжы, за кожным замацаваны пэўныя прадпрыемствы і арганізацыі, якія да 1 чэрвеня павінны прывесці ў парадак: прыбраць леташнюю лістоту, смецце, а таксама, дзе неабходна, адрамантаваць, пафарбаваць або ўсталяваць лаўкі, туалеты, урны, кантэйнеры для смецця.

Гарадская інспекцыя прыродных рэсурсаў і аховы навакольнага асяроддзя таксама вядзе пастаянны кантроль за навядзеннем парадку ў 103 садаводчых таварыствах Віцебска, дзе з пачатку года праведзена 79 маніторынгаў. Перш за ўсё, па словах Валерыя Фандо, правяраецца своечасовая ўборка пляцовак часовага складання. Для гэтага распрацавана схема збору адходаў з кожным садаводчым таварыствам і спецыялісты «Спецаўтабазы Віцебска» па графіку вывозяць смецце. Вясной, калі ўладальнікі дачных участкаў праводзяць масавую ўборку, вывозіць адходы даводзіцца часцей, але ўсе пытанні вырашальныя, адзначыў Валерый Эдуардавіч.

Алена Алімава, "Віцебскія весці"