Гараджане дапамогуць аграрыям Віцебскай вобласці на жніве

Каля 1 тыс. кіроўцаў і механізатараў прадпрыемстваў і арганізацый гарадоў і райцэнтраў Віцебскай вобласці на час жніва стануць хлебаробамі, паведамілі ў камітэце па сельскай гаспадарцы і харчаванні аблвыканкама.

На ўсіх відах сельгасработ у перыяд уборкі збожжавых і зернебабовых культур у гаспадарках рэгіёна будзе занята больш за 7,2 тыс. механізатараў.

"У гэты адказны перыяд уборачнай страды на дапамогу вяскоўцам накіроўваюцца кіроўцы і механізатары з шэфскіх арганізацый, прадпрыемстваў і ўстаноў гарадоў і райцэнтраў. Усяго прыцягнута каля 1 тыс. чалавек", - адзначылі ў камітэце. Парк збожжаўборачных камбайнаў рэгіёна налічвае больш за 1 тыс. 600 адзінак тэхнікі, на якіх старэйшымі камбайнерамі і памочнікамі будуць працаваць каля 2,5 тыс. чалавек. Жніво ў рэгіёне набірае абароты. Па дадзеных на раніцу 26 ліпеня, скасілі 9,4 тыс. га хлебнай нівы, што складае 2,7% ад агульнай колькасці плошчаў збожжавых і зернебабовых культур. Хлебаробы рэгіёна намалацілі 27,6 тыс. т збожжа, пры сярэдняй ураджайнасці 29,4 ц/га. У цэлым аграрыям вобласці трэба ўбраць больш за 350 тыс. га хлеба.

Алена Ціханава - БЕЛТА.