Дзяржаўны архіў Віцебскай вобласці пяройдзе на захоўванне дакументаў у электронным выглядзе
Прывітаўшы прысутных, намеснік старшыні аблвыканкама Уладзімір Пянін адзначыў, што за апошнія гады ў рэгіёне нямала зроблена па развіцці матэрыяльна-тэхнічнай базы архіўнай службы, якая з'яўляецца адной з асноўных у сацыяльнай сферы. Ён выказаў падзяку архівістам за працу і запэўніў, што абласныя ўлады і надалей будуць дапамагаць ім у развіцці.
Дырэктар Дэпартамента па архівах і справаводстве Міністэрства юстыцыі Віктар Кураш паведаміў, што супрацоўнікам у бліжэйшы час трэба будзе вырашаць складаныя задачы.
Паводле рашэння ўрада Беларусі да 2021 года архівісты пяройдуць на захоўванне дакументаў у электронным выглядзе.
Па словах начальніка галоўнага ўпраўлення юстыцыі аблвыканкама Сяргея Канапелька, у справе захавання спадчыны краю Віцебшчына мае глыбокія традыцыі, якія закладваліся ў часы Полацкага княства і ВКЛ. Сёння архіўная служба ўяўляе сабой магутны і самадастатковы арганізм. Супрацоўнікі знаходзяцца ў пастаянным творчым пошуку. Сяргей Канапелько падзякаваў архівістаў за працу па стварэнні выставы «Судовы выканаўца на старонках гісторыі (сярэдзіна XVI ст. – пачатак XXI ст.)», якая не мае аналагаў на прасторах СНД і ў бліжэйшых суседзяў.
Дырэктар Дзяржаўнага архіва Віцебскай вобласці Таццяна Свістунова расказала, што калектыў паспяхова працягвае публікацыйную дзейнасць, чаму спрыяюць надзейныя партнёрскія адносіны з рэспубліканскімі архівамі, музеямі абласнога цэнтра, ВДУ імя П. Машэрава.
Дырэктар Дзяржаўнага архіва Віцебскай вобласці Таццяна Свістунова: Рэальная ацэнка працы сённяшніх архівістаў будзе дадзена нашымі нашчадкамі гадоў праз сто. І спадзяёмся, што яна будзе станоўчай.
Пасля ўрачыстай часткі і ўзнагароджання выдатнікаў працы прайшлі чытанні «Архіўная справа на Віцебшчыне: гісторыя і сучаснасць», у якіх удзельнічалі гісторыкі і краязнаўцы.