Гран-пры Нацыянальнага конкурсу маладых выканаўцаў беларускай эстраднай песні атрымала Ніколь Фургал
Ніколь Фургал таксама ўручаны спецыяльны прыз імя Уладзіміра Мулявіна - крыштальная гітара, які заснаваны па рашэнні Прэзідэнта.
Ніколь Фургал - стыпендыят спецыяльнага фонду Прэзідэнта Беларусі па падтрымцы таленавітай моладзі. Яна з дзяцінства займаецца музыкай. У пяць гадоў стала салісткай шоў-гурта "Какава". Цяпер дзяўчына - салістка шоў-гурта "Со-Ні-Ка", у які ўваходзяць падапечныя аб'яднання "Ветразь" Віцебскага гарадскога цэнтра дадатковай адукацыі дзяцей і моладзі. Калектыў увайшоў у дзесятку фіналістаў нацыянальнага адборачнага тура дзіцячага конкурсу песні "Еўрабачанне-2016". Ніколь Фургал - лаўрэат міжнародных конкурсаў у Літве, Польшчы, Расіі, а таксама многіх нацыянальных конкурсаў.
У гутарцы з карэспандэнтам БЕЛТА дзяўчына прызналася, што выступала ў сваё задавальненне. "Я рабіла тое, што люблю. Я люблю сцэну, гэта маё месца. Мне падабаецца дарыць людзям усмешкі, эмоцыі, перадаваць сэнс песні. Але таксама люблю атрымліваць энергію і ад гледачоў", - сказала яна. Па словах спявачкі, выкананне пад аркестр не было для яе чымсьці новым. "Але кожны раз атрымліваеш незабыўныя эмоцыі, таму што гэта жывая музыка. Зусім іншыя пачуцці, чым калі спяваеш пад фанаграму", - запэўніла яна.
Рашэннем журы трэцюю прэмію і званне лаўрэата атрымала Ангеліна Васілеўская (Мінск), другую прэмію - Ганна Цітовіч (Брэсцкая вобласць), першую - Дзяніс Чуракоў (Магілёўская вобласць).
Цырымонію ўзнагароджання правёў мастацкі кіраўнік Нацыянальнага акадэмічнага канцэртнага аркестра, старшыня журы конкурсу маладых выканаўцаў беларускай эстраднай песні народны артыст Беларусі прафесар Міхаіл Фінберг.
Для ўсіх этапаў конкурсу ўдзельнікі прадстаўляюць дзве песні беларускіх аўтараў на беларускай мове, якія доўжацца не больш за 3 хвіліны 40 секунд. Падчас другога тура рэспубліканскага этапу маладыя выканаўцы спяваюць пад фанаграму, падчас трэцяга - у суправаджэнні аркестра.
ХХ Нацыянальны фестываль беларускай песні і паэзіі "Маладзечна-2021" адкрыўся ўвечары 11 чэрвеня і пройдзе па 13 чэрвеня. Ён сабраў таленавітых выканаўцаў, паэтаў, музыкантаў, кампазітараў, майстроў. Праект накіраваны на захаванне і развіццё роднай мовы, традыцый і нацыянальнай музыкі, спрыяе аб'яднанню творчых сіл, пераемнасці пакаленняў.
Нацыянальны конкурс маладых выканаўцаў беларускай эстраднай песні з'яўляецца неад'емнай часткай фестывалю. Сёлета ў ім прынялі ўдзел 20 конкурсантаў, якія прадстаўляюць вобласці Беларусі і горад Мінск. Выступленне на маладзечанскім фестывалі маладыя выканаўцы лічаць вялікай удачай, а працу з Нацыянальным акадэмічным канцэртным аркестрам Беларусі пад кіраўніцтвам маэстра Міхаіла Фінберга - выдатнай школай прафесійнага майстэрства.
Першапачаткова Гран-пры конкурсу - "Залатая галіна папараці" - быў пераходным прызам. Ён быў выкананы па эскізе маладзечанскага мастака Юрыя Герасіменкі-Жызнеўскага.-0-
