Ідэю атрымання сямейнага капіталу на нараджэнне другога дзіцяці трэба абмеркаваць на УНС - Уладзімір Церанцьеў
Праект праграмы сацыяльна-эканамічнага развіцця на 2021-2025 гады распрацаваны ўрадам сумесна з аблвыканкамамі і Мінскім гарвыканкамам пры ўдзеле Нацыянальнай акадэміі навук і Нацбанка, прадстаўнікоў навуковай і бізнес-супольнасці. У дакуменце пазначаны шырокі спектр тэм і пытанняў, якія ўскосна ці наўпрост закранаюць кожнага беларуса. Сярод абмяркоўваемых новаўвядзенняў – ідэя пашырэння колькасці атрымальнікаў сямейнага капіталу. Яго прапануюць распаўсюдзіць як падтрымку пры нараджэнні другога дзіцяці.
На думку Уладзіміра Цярэнцьева, гэта добрая прапанова, якая выклікала адобрэнне ў медыкаў.
"Магчымасць падтрымкі пры нараджэнні не толькі трэцяга дзіцяці, але і другога, абмяркоўвалі з галоўным урачом абласнога радзільнага дома Аленай Леановіч. Спецыялісты кажуць, што тыя аспекты, якія прагучалі, патрабуюць вывучэння, магчыма, у чымсьці дапрацоўкі і абмеркавання на Усебеларускім народным сходзе з наступным зацвярджэннем у самой праграме", - адзначыў кіраўнік дэпутацкага корпуса вобласці.
Учора Уладзімір Церанцьеў сустрэўся з работнікамі бібліятэк. Удзельнікі закранулі праблемныя моманты ў працы ўстаноў, пытанні фінансавання розных праектаў, папаўнення кніжных фондаў і набыцця сучаснага абсталявання. У апошнія пяць гадоў у рэгіёне абнавілі бібліятэкі ў Гарадку, Сянне, Талачыне, Верхнядзвінску, у Бабінічах і Болбасаве Аршанскага раёна. У планах рамонт Шумілінскай і Глыбоцкай бібліятэк. Таксама на сустрэчы абмеркавалі важнасць адаптацыі спецыялістаў да лічбавай эпохі, уменне прыцягнуць моладзь, а таксама неабходнасць таго, каб бібліятэка была не толькі кніжным месцам, сховішчам ведаў, але і сацыяльна-культурным цэнтрам горада ці раёна.