Ідэалогія памяці пра вайну важная для кансалідацыі і развіцця грамадства - Церанцьеў

Ідэалогія памяці аб Вялікай Айчыннай вайне важная для кансалідацыі і развіцця грамадзянскай супольнасці ў Беларусі, руху наперад без паўтарэння памылак мінулага. Такое меркаванне выказаў намеснік старшыні Віцебскага аблвыканкама Уладзімір Цярэнцьеў падчас урачыстага адкрыцця абноўленага помніка мірным жыхарам, загінулым падчас Вялікай Айчыннай вайны ў вёсцы Баравыя Браслаўскага раёна, паведамляе карэспандэнт БЕЛТА.

Адразу пасля вайны на месцы спалення людзей быў устаноўлены памятны знак, які з гадамі стаў разбурацца. У год 70-годдзя вызвалення Беларусі жыхары сучаснай вёскі Баравыя звярнуліся да мясцовых улад з просьбай аднавіць памятны знак. Раённая арганізацыя грамадскага аб'яднання "Беларускі фонд міру" аказала фінансавае садзейнічанне ў вырабе новай пліты з памятным надпісам, райвыканкам і раённы Савет дэпутатаў, а таксама школьнікі дапамаглі з добраўпарадкаваннем тэрыторыі. Падчас цырымоніі дзеці прынеслі да помніка кошык, напоўнены самаробнымі кветкамі, а зверху падвесілі, нібыта якія парылі над імі, папяровых журавоў - сімвал міру на зямлі.

Гэты мемарыяльны знак стаў сёмым, які быў адноўлены ў бягучым годзе ў Браслаўскім раёне. Да рамонту, абнаўлення і добраўпарадкавання такіх месцаў далучыліся і ўлада, і грамадскія арганізацыі, і мясцовыя жыхары. Як падкрэсліў Уладзімір Цярэнцьеў, вельмі радуе, што сярод насельніцтва ёсць разуменне важнасці памяці аб ахвярах вайны і подзвігу нашага народа, што ініцыятыва па аднаўленні помнікаў, як і праўды вайны, падтрымліваецца ўладамі і грамадскасцю.

Урачыстая цырымонія адкрыцця прайшла сёння пры ўдзеле прадстаўнікоў абласных улад і Беларускага фонду міру. Таксама прысутнічала сведка тых даўніх падзей – Зоя Атрахімовіч. Цяпер ёй 84 гады, але яна яшчэ памятае, як у лістападзе 1942 года жыхары вёскі Баравыя былі зажыва спалены гітлераўцамі. Іх знішчылі за тое, што ніхто не прызнаўся ў забойстве двух немцаў, якіх фашысты недалічыліся, ужо пакідаючы вёску пасля чарговага набегу за нажывай. "Я жыла ў суседняя вёсцы Пастэрнакі, і мы бачылі дым з боку Баравых, але думалі, што проста гараць хаты. Калі ўвечары ніхто з той вёскі не прыйшоў, адправіліся туды самі. І ўбачылі толькі абгарэлыя коміны. Пачалі раскапваць, знаходзілі абгарэлыя парэшткі: па іх, па адзенні апазнавалі людзей", – узгадвае пра тыя страшныя падзеі Зоя Атрахімовіч.

Дзейнасць па аднаўленні памятных знакаў і добраўпарадкаванні пахаванняў на Браслаўшчыне будзе працягнута і ў год святкавання 70-годдзя Вялікай Перамогі, складаецца план мерапрыемстваў і вызначаюцца канкрэтныя месцы – у раёне 49 воінскіх пахаванняў і 29 памятных знакаў.

Кацярына Князева