II Міжнародны фестываль-конкурс «Арт-парад у Віцебску» стане прэамбулай да святкавання 30-годдзя «Славянскага базару».
«Арт-парад», як адзначыў генеральны дырэктар Цэнтра культуры «Віцебск» Глеб Лапіцкі, і задумываўся як малодшы брат найбуйнейшага еўрапейскага форуму мастацтваў. Мінулагодняе дэбютнае выступленне новага зімовага фестывалю паказала, што ён запатрабаваны маладымі талентамі многіх краін. Як толькі сёлета на сайтах ЦК «Віцебск» і турыстычнай фірмы «Ілва», якая выступіла саарганізатарам праекта, з'явілася інфармацыя аб правядзенні другога конкурсу, сталі прыходзіць лісты ад патэнцыйных удзельнікаў. Першымі цікавасць праявілі беларускія артысты, а таксама прадстаўнікі Казахстана, Расіі, Латвіі, Кубы. Прыём заявак на ўдзел у праекце ўжо пачаўся і працягнецца да 15 снежня 2020 года.
– Мы хочам правесці фестываль офлайн, але ў залежнасці ад эпідэміялагічнай сітуацыі гатовыя і да іншых варыянтаў. Дырэкцыя мае досвед арганізацыі мерапрыемстваў у розных фарматах, – падкрэсліў Глеб Лапіцкі.
«Арт-парад» захоўвае свае галоўныя мэты – стварэнне ўмоў для самарэалізацыі таленавітых дзяцей і моладзі, умацаванне міжнародных сувязяў і прапаганда нацыянальных культур. Другі фестываль пашырыць свае межы. Па-першае, знята ўзроставае абмежаванне да 25 гадоў. Цяпер у конкурсе могуць прыняць удзел творчыя калектывы і выканаўцы ад 6 гадоў і старэй (наколькі – не ўстаноўлена). Па-другое, павялічылася колькасць намінацый: да вакалу і харэаграфіі дадаліся інструментальная музыка, выяўленчае мастацтва, а таксама дэкаратыўна-прыкладное мастацтва і мастацкія рамёствы. У сувязі з гэтым з'явяцца новыя канцэртныя пляцоўкі і новыя аб'екты ў экскурсійнай праграме. Яна з'яўляецца складовай часткай фестывальнай праграмы, і, як распавяла дырэктар турфірмы «Ілва» Ларыса Пятроўская, удзельнікаў чакаюць цікавыя паездкі, знаёмства з славутасцямі Беларусі і майстар-класы ад вядучых майстроў і педагогаў.
Першы фестываль ужо заклаў традыцыю – пачынаць яго з казкі. Галоўны рэжысёр ГЦ «Віцебск» Ірына Коўлена расказала, што заслону другога «Арт-параду» адкрые мюзікл па вядомай ва ўсім свеце гісторыі пра Пятра Пэна, напісанай шатландскім пісьменнікам Джэймсам Мэцью Бары. А завершыцца форум відовішчным гала-канцэртам, на якім назавуць пераможцаў. Згодна з умовамі конкурсу ўладальнік Гран-пры атрымае права выступіць на адным з афіцыйных мерапрыемстваў юбілейнага «Славянскага базару».