Чэрвень адзначыўся павышанай цікавасцю інвестараў да нерухомасці ў Віцебскай вобласці

У першым паўгоддзі фонд «Віцебскаблмаёмасць» па выніках аўкцыёнаў распрадаў нерухомасці амаль на 3,6 млрд рублёў, пры гэтым каля чвэрці сумы ўдалося выручыць толькі за чэрвень.

Іншымі словамі, першы летні месяц адзначыўся павышэннем актыўнасці інвестараў, так што нават у яго апошні дзень патэнцыйныя пакупнікі напружана гандляваліся за невыкарыстоўваемую нерухомасць.

Больш за паўсотні крокаў давялося зрабіць аўкцыёністу для таго, каб выявіць пераможцу на таргах за права пакупкі двухпавярховага будынка былога склада 1936 года пабудовы ў вёсцы Межыца Лепельскага раёна. Будынак агульнай плошчай звыш 1,2 тыс. кв. м выстаўляўся на аўкцыён з пачатковай цаной у адну базавую велічыню, а зямельны ўчастак для яго абслугоўвання памерам каля 0,1 га прадастаўляецца ў арэнду на 50 гадоў. Два ўдзельнікі праявілі цікавасць да лота, а калі цана са 180 тыс. пераваліла за мільён, стала зразумела, што ў абодвух сур'ёзныя віды на нерухомасць. У выніку пераможцу давялося прапанаваць за пакупку 73 млн рублёў, што ў 450 разоў перавысіла пачатковую цану.

У бліц-інтэрв'ю «Віцебскім весткам» новы ўладальнік старадаўняга будынка паведаміў, што аб'ект будзе выкарыстоўвацца па прамым прызначэнні: у непасрэднай блізкасці ад склада інвестар мае вытворчасць кармавых дабавак і для развіцця бізнесу адчувае патрэбу ў пашырэнні складской гаспадаркі.

З пачатку года на таргах прададзена 33 аб'екты нерухомасці, з якіх звыш 73% адносіліся да камунальнай уласнасці. Усяго ў бюджэт ад рэалізацыі маёмасці паступіла больш за 5,2 млрд рублёў, ад здачы ў арэнду нерухомасці – каля 9 млрд руб. Даход ад пералічэння часткі прыбытку ўнітарных прадпрыемстваў перавысіў 25,6 млрд руб., а памер выплачаных дывідэндаў на долі (акцыі), якія належаць Віцебскай вобласці, склаў каля 3,7 млрд руб.

Сяргей Анто́наў, "Віцебскія весці"